گادتب: هله کئچمیشلری دئمیرم ، کئچه ن بیر ایل یاریمدا عباس بی لیسانی بیر چوْخ چتینلیکلره ، مصیبتلره دؤزوب ، اوْنلاری باشدان سوْوماغا مجبور اوْلموشدور :
_تقریباً بیر ایل یاریم دیر ناحاق یئره یاخالانیلیب ، حبس سالینیبدیر و 15 ایل حبس چکمه یه و سورگونه محکوم ائدیلمیشدیر.
بو بیر ایل یاریمدا لیسانی عاییله سینی مالی ومعیشت باخیمیندان سیخینتییا سالماق اوچون گنج اوْغلونون ایش یئرینی پوْلومپ ائدیب باغلامیشدیلار.
– حؤرمتلی حیات یوْلداشی رقیه خانیمین آتاسی رحمته گئتدی ، اجازه وئرمه دیلر یامان گونده ، گلیب مصیبتلی یوْلداشینا تسکین اوْلسون …
_آلتی آی دیر کوْروْنا ویروسو اؤلکه نی گؤتوروب ، اردبیل شهرینین دورومو آیلاردیر قیرمیزی دیر.
بو آرادا بیر چوْخ محبوسلارا مرخصلیک وئردیلر هم خسته لنمه دن آماندا قالسینلار ، هم عاییله لرینه دایاق اوْلسونلار.
حتی اوْغرویا ، ایرییه ، قاچاقچییا مرخصلیک وئردیلر ؛ آنجاق عباس بی یه مرخصلیک وئرمه دیلر … قوْیمادیلار بو بلالی گونلرده اؤز عاییله سی نین یانیندا اوْلسون.
_نئچه گون دور بؤیوک قارداشی نین وای خبری هر یانا یاییلیبدیر ؛ ائشیدن ، بیله ن اوزاقدان
_یاخیندان تسلیت دئییب ، باش ساغلیغی وئریر … آنجاق عباس بی زینداندا یالقیز باشینا قالیبدیر و بوتون بو مصیبتلره تک باشینا دؤزمه لیدیر.
یار_یولداشی یانیندا دئییل قوْلتوغونا گیره ، بیری یوْخ دور قارداش اؤلومونون خبری گلنده یانیندا دوروب سنه تسلّی وئره …
هامی مجبوروق اوزاقدان_اوزاغا سنه تسلیت دئییب باش ساغلیغی وئرک
سنه و عزیز قارداشیوین باشقا قالانلارینا آیدین گله جک آرزو ائده ک ….
بیلیرم ، قارداش اؤلومو آجی و آغیردیر …
مشهور دور دئییرلر قارداش اؤلومو ، قارداشین بئلینی ایه ر !
آنجاق سن اییلمه قارداش ؛ اخی سن صبیر داغیسان !
داغ کی ، اییلمز …
یقین ائدیرم عباس بی بو تضییقلر قارشیسیندا سارسیلمایاجاق ، اؤز حاقلی مبارزه سینه داوام ائده جک.
وطن اوغروندا ، ملت اوغروندا مبارزه داوام ائدیر و عباس بی بو مبارزه نین اؤن سیراسیندا ایره لی گئدیر.