ادتاج اتحادیه دمکراتیک ترک آذربایجان جنوبی
گادتب: اشغالچی ارمنیستانین آذربایجان رئسپوبلیکاسینین 20 فائیزدن چوخ ارا‌ضیسینی ایشغالدا ساخلاماسی بس دئییل، ایندی ده توووز منطقه‌سیندن آذربایجان دؤولت سرحدینی پوزماسی و آذربایجان میللی اوردوسونون عسگرلرینی شهید ائتمه‌سی بئین الخالق سویه‌ده تانینان دؤولت سرحدلرینی پوزماسی و حربی تجاووزدور. حاقلی اولا‌راق آذربایجان اوردوسو پوتینین ائرمنی الی ایله تورکیه و آذربایجان دؤولت‌لری، ائله‌جه ده آذربایجان تورک میللتی‌نین صبرینی سیناغا چکمه‌یه جهدینه سارسیدیجی جواب وئرمیش‌دیر.
پوتینین یئنی اراضی ادعا‌لاری فونوندا روس ال آلتی‌سی اولان ائرمنی‌لرین یئنی تجاووزو رئگیوندا همچینین تورکیه‌نین، گونئی آذربایجاندا تورک میللتی‌نین، حتی کرکوک تورکمن‌لرینین بئله سرت تپکی‌سی ایله قارشیلاشمیش‌دیر. سؤزسوز کی، تورک دوشمانی اولان روس و ائرمنینین لاییقلی جوابی وئریلمه‌سه اونلارین یئنی تجاووز و ایشغالچی‌لیق سیاستینی تجروبه ائتمه‌لی اولاجاغیق. بونو نظره آلا‌راق آذربایجان اوردوسونا روس ایسته یی ایله دور امری وئریلمه مه‌لیدیر.
آذربایجانین ایشغال اولونموش اراضی‌لریندن اونلارلا کیلومتر کناردا – توووزدا باش وئرن یئنی تجاووز فاکتینی پیسله‌ین گونئی آذربایجان دئموکراتیک تورک بیرلیگی (گادتب) بیلدیریر کی، بیرلشمیش میللتلر تشکیلاتینین تهلوکه‌سیزلیک شوراسینین آذربایجانین 20 فائیز ایشغال اولونموش اراضی‌لرینین قئیدسیز-شرط‌سیز بوشالدیلماسینا دایر 4 قطعنامه‌سینی هله ده ایشغال‌چی ائرمنیستانین ایجرا ائتمه مه‌سی، آذربایجانا اؤز اوردوسو حسابینا ایشغال اولونموش اراضی‌لرینی آزاد ائدیب، اراضی بوتؤو‌لوگونو برپا ائتمه‌یه تمایله حاق وئریر. هم گونئی آذربایجاندا تورک میللتی، هم ده گونئی آذربایجان دئموکراتیک تورک بیرلیگی (گادتب) بو حاق ایشده آذربایجان دؤولتی‌نین یانیندا‌دیر و آذربایجان تورپاق‌لارینین یئگانه آزادلیق یولونو آذربایجان اوردوسونون ائرمنی‌لرین تئررور یوواسینا چئویردیگی آزربایجانین ایشغال اولونموش اراضی‌لرینده آنتی‌تئررور عملیاتینا باشلاماسیندا گؤرور.
اوردوموزا بو حاق یولدا اوغورلار، شهیدلریمیزه رحمت دیله ییریک.
اژدر تاغیزاده گونئی آذربایجان دئموکراتیک تورک بیرلیگی (گادتب) باشقانی
