ادتاج اتحادیه دمکراتیک ترک آذربایجان جنوبی
گادتب-نين مطبوعات مرکزينه داخيل اولان معلوماتا گؤره، 15 نويابر قوزئي قيبريس تورک جمهوريتينين اعلاني گونو موناسيبتي ايله بو تورک اؤلکه‌سينين ميللي بايرامي آوستراليادا قئيد ائديليب.
آوستراليادا کئچيريلن قوزئي قيبريس تورک جمهوريتينين ميللي بايرام تدبيري و ضيافت مراسيمينه گونئي آذربايجان دموکراتيک تورک بيرليگينين (گادتب) بين الخالق علاقه لر دئپارتامئنتينين صدري و آوستراليا آذربايجانليلاري آسوساسياسينين پرئزيدئنتي سايين ميکائيل بي اويتا و گادتب-نين مالييه دئپارتامئنتينين صدري سايين سيما خانيم دا دعوت ائديليب.
تدبيرده قوزئي قيبريس تورک جمهوريتينين و تورکيه‌نين کونسوللاري چيخيش ائده‌رک، گونئي آذربايجان دموکراتيک تورک بيرليگي فونکسيونئرلرينين همين تدبيره قاتيلمالاري اوچون اونلارا تشکور ائديبلر.
قوزئي قيبريس تورک جمهوريتينين قورولماسي و آپاريلان مباريزه لرده فعال ايشتيراک ائدن تورکلره قيزيل مئدال وئريليب. تدبير ضيافت مراسيمي ايله داوام ائديب.
