ادتاج اتحادیه دمکراتیک ترک آذربایجان جنوبی
گادتب: آذربایجان تورکونون و باشقا میللت‌لرین اراضی‌سینی ایشغال ائدن ایشغالچی و ایرتیجا‌چی فارس-موللا رئژیمینین میللتیمیزه قارشی جینایت و ظلمو آرتیب. بونونلا یاناشی سون گونلرده آمریکانین باش تئررورچو قاسم سلیمانی و اونون یئتیشدیردیگی تئررورچولاری محو ائتمه‌سی بو جینایتکار و ایرتیجا‌چی موللا رئژیمینین اطرافینا توپلادیغی گئری ذکا‌لی و گئری قافا‌لی اینسان‌لاری کوچه‌لره چیخارماسینا سبب اولدو. بوندان مقصد ایسلام پرده‌سی آلتیندا فارس شووینیزمینی گوجلندیرمک و یایماقدیر.
ایرتیجا‌چی و ایشغالچی فارس رئژیمی اؤلکه نی تئرروریزمین منبعینه و ایخراجاتچیسینا چئویریب، قونشو اؤلکه‌لرده گئری قافا‌لی اینسان‌لاری ایشه آلماقلا تئررورچو قروپلاشما‌لار فورمالاشدیریب رئگیون اؤلکه‌لرینی قان گؤلونه بوغوبلار. رئژیم بو ایستیقامتده ثبوت ائتدی کی، ان تهلوکه‌لی و قان ایچن تئررورچولاری بونلار حاضیرلاییرلار. آنجاق بو تئررورچولارلا دا رئگیون میللتلرینی قانا بویاییرلار.
موللا رئژیمی گئری قالمیش، زامانلا آیاقلاشا بیلمه‌ین ایرتیجا‌چی، ایرقچی و تئررورچو رئژیم اولا‌راق آمریکا و غربه یالنیز هده-قورخو اویونو اویناییر. بو ایرتیجا‌چی رئژیمین آنجاق اشغال ائتدیگی گونئی آذربایجانا، غیری-فارس خالقلارا و بیر ده 5-نجی کالون واسطه‌سیله نفوذ ائتدیگی قونشو اؤلکه‌لرین مظلوم خالقلارینا گوجو چاتیر. یالنیز الی یالین همین خالق‌لارین آزادلیق روحونو قان گؤلونده بوغماغا گوجو چاتیر. بو گون گونئی آذربایجاندا یوزلر سویداشیمیز عدی اینسانی حاق‌لارینی طلب ائتدیگی اوچون رئژیمین زیندان‌لاریندا ایشگنجه آلتیندا‌دیر. مین‌لرله فعالیمیز هر گون چئشیدلی تضییقلره معروض قالیر.
سون آیلاردا ایشغالچی فارس رئژیمین باسقیجی ماهیتی‌نین اوزه چخماسی و داها آرتیق مالیه ایمکان‌لارینین ضعیفلمه‌سی ایله اؤز ماهیتینی پرده‌لمک اوچون آمریکانین ال-آیاغینا دولاشماغا و واختی کئچمیش ایرتیجا‌چی شعارلارینا قاییتدیلار. اونلار عراقدا اهمیت‌سیز بیر آمریکا عسگرینی اؤلدورمکله سون حادثه‌لره استارت وئریرلر. آردینجا آمریکا موللا رئژیمین تئررورچو قروپلارین‌دان حشد شعبی‌نین بازا‌لاریان هجوم ائدیر، داها سونرا باش تئررورچو قاسم سلیمانی و اونونلا بیرلیکده 12 تئررورچونو محو ائدیر. ایران ایسه باش تئررورچونون قول-قیچینی توپلاماقلا شهر-شهر گزدیریب و اهالینی ده زورلا ویداع مراسیمینه گتیزدیریر و کرماندا بیر کوچه‌یه سیخیش‌دیرماقلا 78 نفر اینسانین آیاق آلتدا قالیب اؤلمه‌سینه 300-دن اینسانین خسته‌خانا‌لیق اولماسینا سبب اولور. آردینجا ایسه آمریکا ایله راضیلاشدیریلمیش راکئت ضربه‌سی تاماشاسی زامانی سرنیشین طیاره‌سینی وورماقلا 180 نفر گوناه‌سیز اینسانی قتل عام ائدیر. بو ایسه مسئله‌نین گؤرونن طرفی‌دیر. اصلینده رئژیمین داغیجیدی سیاستی اؤلکه‌ده هر ساحه نی آشیندیریب و گونده بیر اتوبوس و باشقا نقلیات واسطه‌سیله آشینمیش احتیاط حیسه‌لریله قضایا سبب اولماقلا یوزلرله اینسان حیاتینی ایتیریر.
اصلینده 40 ایلدیر ایرتیجا‌چی موللا رئژیمی یالاندان آمرکانی هده‌له‌ییب اونونلا محاربه ائتدیگینی ادعا ائتسه ده، اصلینده گوللنی بو رئگیوندا اولان خالقلارا، خصوصیله گونئی آذربایجان تورکونه آتیر و اونلاری قیریر. حالبوکی، موللا رئژیمینین آغ یالان دانیشدیغی داها هامییا معلوم‌دور و یالانچی‌لیق، ائله‌جه ده ریاکارلیغین موللانین و خامنه یی‌نین خصلتی‌نین ترکیب حیسه‌سی اولماسی آرتیق اینکار ائدیلمز فاکت‌لارلا ثبوت ائدیلیب. آمریکا ایله راضیلاشیب باش تئررورچو قاسم سلیمانی‌نین قیصاصی گؤرونتوسو اوچون آمریکا عسگرلری‌نین اولمایاجاغی نقطه‌لره راکئت ضربه‌سی تاماشاسی ایجرا ائدرکن خامنه یی‌نین قولاغینین دیبین‌دن – تهران‌دان گؤیه قالخان سرنیشین طیاره‌سینی ووروب 180 گوناه‌سیز اینسانی قتل عام ائدیرلر. دونیا ایله آیاقلاشا بیلمه‌ین بو ایرقچی و ایرتیجا‌چی رئژیم مین بیر یالان اویدورماقلا راکئتله ووردوغو طیاره‌نین وورولماسینی پرده‌لمه‌یه چالیشدی. لاکین اینکار ائدیلمز فاکت قارشی‌سیندا رذیل اولوب دونیا ایجتیماعیتینی آلداتدیقلارینا اعتراف ائتمه‌یه مجبور اولدولار. رذیل دوروما دوشموش خامنه ییه حاق قازندیرماق اوچون ایسه یالاندان بیلدیریب‌لر کی، گویا خامنه ییه 2 گون سونرا معلومات وئریب‌لر.
بو گون هئچ بیر اؤلکه ترانین ایرتیجا‌چی رئژیمینین عمل‌لرینی اؤرت-باسدیر ائده بیلمزلر. بو گون دونیا بو رئژیمین بؤیوک تهلوکه اولدوغونو آنلاما‌لی‌دیر. ریاکار خامنه ییه آغام، پوتینه قاغام دئین‌لر بیلمه‌لی‌دیرلر کی، حتی اونلارین دا جانلاری تهلوکه‌ده‌دیر و هامینین قاپی‌سی دؤیوله‌جک. گونئی آذربایجان، قوزئی آذربایجان، تورک دونیاسی و عمومیتله سیویل دونیا تهلوکه‌ده‌دیر.
بیز گونئی آذربایجان دئموکراتیک تورک بیرلیگی (گادتب) اولا‌راق ایرقچی و ایشغالچی فارس رئژیمینین بوتون آذربایجانا تهلوکه‌سینی گؤرور و بونا قارشی مباریزه آپاریریق. بیز گونئی آذربایجان سیویل، دئموکراتیک و معاصر آذربایجان تورک جمهوریتینی قوروب و میللتیمیزی بو اسارت‌دن قورتارماغی قارشییا مقصد قویموشوق. بیز ایستمیریک ایرتیجاع و فارس شووینیزمی آذربایجان تورکونو اویان-بویانا سورویوب اؤلومه وئرسین. مقصدیمیز مستقیل و آزاد آذربایجاندیر.
اژدر تاغی‌زاده
گونئی آذربایجان دئموکراتیک تورک بیرلیگی‌نین (گادتب) باشقانی
