ادتاج اتحادیه دمکراتیک ترک آذربایجان جنوبی
گادتب: 1828-جی ایلدن ایشغالچی اؤلکه‌لر طرفیندن پارچالانمیش آذربایجان و آذربایجان تورک میللتی 1989-جو ایلین سونلاریندا قوزئی آذربایجانین استقلالینی برپا ائتمه عرفه سینده آذربایجان تورک میللتینین آراز چایی بویونجا تیکانلی مفتیللری و عمومیتله سرحد مانعه‌لرینی داغیدا‌راق، حسرت یاشایان باجی-قارداش‌لارین گؤروشوب قوجاقلاشماسی، پارچالانمیش آذربایجاندا آذربایجان تورک میللتینین بیرلشمه‌یه ایسته یین نئجه درین کؤک‌لره مالیک اولدوغونو بیر داها ثبوت ائتدی. بو واسیطه ایله آذربایجانین قوزئیی و گونئینده یاشایان آذربایجان تورک میللتی اؤز بیرلیک و همرأیلیگینی عملده گؤستردی و بئله‌لیکله 31 دئکابر دونیادا آذربایجان تورکونون بیرلیک و همرأیلیک سیموولونا چئوریلدی.
آذربایجانلیلارین همرأیلیگی دئییلنده قوزئی و گونئی آذربایجانین بیرلشمه سی و بوتؤولشمه سی نظرده توتولور. بو ایسه گلستان و تورکمنچای مقاویله سیندن یوز ایللر کئچسه ده آذربایجان تورک میللتینین بو پارچالانما ایله باریشمادیغینی گؤستریر.
31 دئکابر میللی بیرلیک و همرأیلیک بایرامی کیمی آذربایجان تاریخینه دوشسه ده، هم ده بو میللتیمیزین بوتؤولوک اوغروندا آپاردیغی میللی ساواشینین سیموولیک گونو حساب ائدیلیر. آذربایجان 200 ایلدیر پارچالانمیش بیر تورک میللتینین وطنی‌دیر. بو میللتین بیرلشمه ایسته یی نه قدر بؤیوک اولسا دا، قارشی‌سینی کسن مانعه‌لر ده قات-قات بؤیوک‌دور. 40 میلیونلوق گونئی آذربایجان تورکو، الی سلاحلی عیرقچی فارس رئژیمین اشغالی آلتیندا‌دیر. گونئیین موستقیل‌لیک قازانیب، بوتؤو آذربایجانین یارانماسی، بو بیرلیک بایرامینین گئرچکلشدیگی گون اولا‌جاق. بو یولدا بؤیوک میللی-سیاسی بیرلیک و همرأیلیک طلب اولونور.
آذربایجانین بیرلیگی و همرأیلیگینه اساس مانعه ایسه آذربایجان تورپاقلارینین دوشمن‌لر طرفیندن ایشغالدا قالماسی‌دیر. قاراباغین ایشغالدان آزاد ائدیلمه‌سی آذربایجان دؤولتی ایله یاناشی بوتون دونیادا یاشایان آذربایجان تورک میللتینین اساس آما‌لی، مقصدی و وظیفه‌سی‌دیر. لاکین قاراباغی اونوتما‌دان هر شئی‌دن اؤنجه بوتون آذربایجان تورکو بیلمه‌لی‌دیر کی، آذربایجانین بؤیوک حیسه‌سی اولان گونئی آذربایجان تام ایشغالدا‌دیر. قاراباغ مسئله‌سی ایله مشغول اولوب، آذربایجانین گونئیینی اونوتماق جدی موثبت نتیجه وئرمه‌یه‌جک. چونکی، گونئی آذربایجانین تام موستقیل اولماسی ایله آذربایجان دؤولتی رئگیوندا اساس دوشمن‌لریمیزین قارشی‌سیندا دایانا بیله‌جک بؤیوک گوجه چئوریلیب، قاراباغی دا آسانلیقلا آزاد ائده بیلر.
گونئی آذربایجان دموکراتیک تورک بیرلیگی (گادتب) 31 دئکابر – دونیا آذربایجانلی‌لارینین همرأیلیک گونونو پارچالانمیش آذربایجان تورکونون همرأیلیک و بوتؤولشمه پروسئسینده چوخ مهم حادثه کیمی دگرلندیره رک، بو موناسیبتله بوتون آذربایجان تورکلرینی تبریک ائدیر. فیکزیمیزجه میللتیمیزین و وطنیمیزین عملده تام بوتؤولشمه‌سی اوغروندا بیرلیکده مبارزه آپارماق هر بیر آذربایجان تورکونون وظیفه سیدیر و گادتب بو ایستیقامتده اؤز فعالیتینه داوام ائدیر.
اژدر تاغی‌زاده
گونئی آذربایجان دموکراتیک تورک بیرلیگی (گادتب) باشقانی
