ادتاج اتحادیه دمکراتیک ترک آذربایجان جنوبی
گادتب: سئويملي آذربايجان تورک ميلتي!
بو ايل وط‌نيميزين گونئيينده قورولان ميللي دؤولتچيليگيميزين 74-جو ايل دؤنومودور. 21 آذر آدي ايله ده آنيلان گونئیده ميلتيميزين يوکسک ايراده‌سي سونوج وئره‌رک تبريز مرکزلي ميللي دؤولتيميزين قورولوشو گرچکلندي. س. ج. پيشه وري اؤندرليگينده گونئي آذربايجاندا اؤزرک ميللي حاکيميت ائلان ائديلدي. تورک قاجار دؤولتچيليگينين ييخيلماسييلا ياشام اوميدلري، پانفارسيزمين فاشيست ائيله‌مري ايله دارما-داغين اولان آذربايجان تورک ميللتينين اؤزگورلوک ديلکلري يئنيدن ديريلمه‌يه باشلادي.
سياسال، سوسيال و ميللي ساوونما اوزرينده يوغونلاشان اؤزرک دؤولت سيستئمي، چوخ کئچمه‌دن ميلتيميزين بوتون ياشام آلانلاريندا گئنيش دييشيکلييه ال ووردو. ايلک اولاراق تورک ديلي آذربايجانين رسمي ديلي اعلان ائديلدي. بوتون ائييتيم سيستئمي اوشاقلارين آنلاديغي ديلده قورولدو. بؤلگه‌نين بيليميوردو تاسيس ائديلدي. زانگاندان اوزو بري بوتون ايري شهرلرده ميللي قزئته‌لر ياييلماغا باشلادي. تورک اينسانينين معاريفلنمه‌سي آذربايجان ميللي حؤکومتينين ان اوستون گؤروينه چئوريلدي. جمعيت ايچريسينده عدالتلي داورانيش بيچيمي جيديليکله تعقيب اولوندو. ميلت ايچينده زورباليغا سون قويولدو. کند ياشاميندا درين دوزئيلي سيستئم دييشيکليگي ياراندي. ارباب-رأيت سيستئمينه اؤلومجول داربا وورولدو. ائکونومي سيستئمي ميلليلشمه‌يه يؤنلدي. اؤلکه‌نين ايشغالينين قارشيسيني آلماق اوچون فدايي دسته‌لريندن عيبارت ميللي اوردو ياراندي.
هر شئي ميللتيميزين ايستگي کيمي ايره‌ليله ينجه دونيانين سؤمورگن اؤلکه‌لري قورخويا دوشدولر. آمئريکا-اينگيلتره فاشيست فارسچي رئژيمينين هاميسي کيمي، روسيا ايسه آذربايجان دئموکرات فيرقه‌سينين دوستو سيماسيندا سياسي آليش-وئريشه گلديلر. بو سياسي آليش-وئريشده نجيب ميللتيميزين بوتون اينسانجيل آرزولاري بير آن ايچينده قوربانليق اولدو. روسلارين الي ایله آذربايجان سيلاحسيزلاشدي. اينگيلتره و آمئريکانين اليله ايسه، فارسچي فاشيست رئژيمين داغيلميش اوردوسو محض آذربايجانين ايشغالي اوچون سيلاح-سورساتلا يئنيدن قورولدو. آذربايجان يئنيدن ايشغال اولوندو. اون مينلرجه سوچسوز سويداشيميز ايشغالچي فاشيستلرين اليله هلاک اولدو. آذربايجان ميللي حؤکومتينين بير ايل ايچينده الده ائتديگي بوتون ايمکانلار آرادان قالديريلدي. يوز مينلرجه سيويل عاييله لر ايران آدلانان اؤلکه‌نين اوجقار بؤلگه‌لرينه سورگون ائديلدي.
عزيز ميللتيميز!
گؤردويونوز کيمي، عزيز يوردوموز – آذربايجان، 1925-جي ايلدن اوزو بري فاشيست فارسچي رئژيمين بوتون بويودلو ميللي معنوي و دونيوي ايشغاليندادير. ميللي و معنوي ايشغال آلتيندا اولان ميلتيميزين اؤزگور ايراده‌سينين آن با آن آرتماسينين شاهيدييک. آذربايجان ميللي حؤکومتينين گنجليگيميزه وئرديگي بؤيوک درسلردن يولا چيخاراق ” اسارت زنجيريني قيرام-قيرام دئييل، بيردن قيرماق گره‌کير!” حؤکمو ايره‌لي گلمکده‌دير.
بورادا آذربايجان دئموکرات فيرقه‌سينين سياستلريني الشديرمک دئييل، ضعيف توتومونا بير داها دوشمه‌مک يوللاريني آختارماغي دوشونمک گره‌کير. بير کره، بونو بيلمک لازيمدير کي، گونئي آذربايجانين گله‌جگي ايرانين فاشيست دؤولتچيليگي شرطلري ايچينده دئييل، بین الخالق میللتلر تشکیلاتینين و دونيا دوزه‌ني ايچينده ايره‌لي سورولمه‌ليدير.
شيعه-فارسچي رئژيمين عؤمرو سونا چاتماقدادير. آرتيق بونو دويمايان قالماميشدير. آنجاق، بوندان سونراکي آلترناتيوين نئجه‌ليگي آذربايجان ميللي حرکاتيني دريندن دوشوندورمه‌ليدير. گنجليگيميزين اؤزگور و باغيمسيز ميللي ايراده‌سي گونده‌مي ائتگيله‌ين اينگيليزجه “هاراي-هاراي من تورکم!” ،” تبريز-باکي-آنکارا، بيز هارا فارسلار هارا” ،”گونئي آذربايجان ايران دئييل!” ،” يوگوسلاواکي، يوخسا چئکوسلاواکيا؟ سئچيم سيزينله‌دير!” کيمي آيدين مئساژلارلا اورتايا قويوبدور. بو استراتئگييانين اورتايا قويولماسي 100-ايلليک ميللي اسارتين سونوجو اولاراق ميلتيميزين ده ميللي گؤروشونو، گله‌جک آرزولاريني عکس ائتديرن ميللي قورتولوش و تک آنلامي ايله ايستيقلال،دير!
عزيز ميللتيميز!
بيز بيرليکده آذربايجانيميزين بير داها ايران ايچينده ازيليب باسيلماسينا ايزين وئرميه‌جگيک. دوغال زنگينليگي ايله دونيا دوزئيينه چيخميش يوردوموزون ميللي-سياسي و گرچک زنگينليگي اولان ايستيقلاليني دا بشريته ارمغان ائده‌جگيک. بير آنليغينا ايستيقلال دوشونجه‌سيندن واز کئچمک گله‌جک نسيللر اوچون ميللي خيانتدن باشقا دئييل.
ايستيقلال! سونونا دک ايستيقلال آذربايجان تورک ميلتينين هم ده 1828-جي ايل پارچالانميش ميلت-وتن نيسگيلينه سون قويماق دئمکدير.
ياشاسين 21 آذر شهيدلرينين خاطيره‌سي!
اژدر تقي زاده
آذربايجان دئموراتيک تورک بيرليگينين (گادتب) باشقاني
