پنج‌شنبه , مارس 28 2024
azfa
تازه ها

حسن راشدی: خُرداد قيامي‌نين 13- جو ايل دؤنومو

گادتب: 1385 – جي ايلين اورديبهشت آيي‌نين 22 – سينده «ايران» قزئتينده توركلر عليهينه چَكيلَن توهينلي كاريكاتورا اعتراض اوْلاراق 8 گون سوْنرا و خُرداد آيي‌نين بيرينجي گونو، تبريز شهرينده، گنج اؤيرنجيلردن توتدو دانشگاه اوستادي، معلّیم، ايشچي، تاجیر و عادي كسبه‌يه قَدَر يوز مين‌لرله اینسان، تبريز خيابانلاريندا توپلوم و مدني اعتراضا ال آتاراق «ايران» گونده‌ليگينده، اوتانمادان و حياسيز‌جاسينا ميليونلارلا تورك اینسانينا سرت حورمتسيزليگي قيناييب اؤلكه مسئوللارينا و بوتون دونيايا اعتراضلاريني بيلديرديلر.

تبريز اهاليسي‌نين شدتلي اعتراضيندان سوْنرا، اوروميه‌ليلر، اوْندان سوْنرا «سولدوز» (نقده)، قوشاچاي، زنجان، خياوْ، موُغان ، اردبيل و آذربايجانين باشقا شهرلري و حتّا تهراندا ياشايان توركلر بو عمومي اعتراضا قوشولاراق آذربايجان میلّتينه توهين ائدَنلره و شوونيستي دوشونجه‌ني «ايران» قزئتي يولو ايله يايانلارا اؤز غضب‌لريني گؤسترديلر.

تأسّف‌لر ‌اوْلسون آذربايجانليلارين بئله مدني اعتراضلارينا و قانوني ايستَك‌لرينه گؤزله‌نيلمَز سرت جاوابلار وئريلدي و اوْنلارین مدني اعتراضلاري آل قانلارینا بویانماقلا سونوجلاندی!

1385- جي ايلين خُرداد آييندا آذربايجان شهرلرينده‌كي اعتراضلار گؤستردي كي، آذربايجانليلار اؤز حقلريني دريندن دوشونَركن، بو حقلرين تاپدالانماسينا و توركلرين نسبي اكثريت اوْلوب اقليّت حقوقوندان محروم قالماسينا بي‌تفاوت قالماغي و اوْنلارین هويّت و شخصيت‌لرينه توهين ائدَنلري جاوابسيز قويماغي جايز گؤرمورلر.

خُردادين بيرينجي گونوندن باشلاياراق يئددي‌سينه قَدَر و آرديجيل داوام ائدَن آذربايجان شهرلري‌نين اعتراضلاريني، يالنيز دؤلت اورگاني ساييلان «ايران» قزئتينده گئدَ‌ن حورمتسيزليگه قارشي اعتراض آدلانديرارساق، يانيلميش اولاريق؛ بلكه بو گئنيش اعتراض، اوُزون ايللر و مختلیف يوللارلا اوْ جمله‌دن راديو- تئلويزيون، مطبوعات، سينما، تياتر، درسي و غير درسي كیتابلار، چيخیشلار و باشقا جمعي ارتباط وسيله‌لري ايله آذربايجان میلّتي عليهينه اوْلان تحقير و توهينلر نتيجه‌سينده آذربايجانليلارين بوغازلاريندان قالخان نیفرت پوسكورتوسو ایدی!

خُرداد حادثه‌سي گؤستردي كي، آذربايجانليلار دؤزوملو اینسان اولاركَن، اوْنلارین دؤزوملري‌نين حدّي- حدودو وار، اوْنلارین دؤزوم كاسالاري داشارسا اوندا داها اوْنلارین قاباغيني آلماق چتين‌دير!

1385- ایل و خُرداد قیامی بير داها ثابت ائتدي ايراندا شوونیستی و پان ایرانیستی سیاست ایله اؤلکه‌نی اداره ائتمک اولماز، بلكه ايران آدلانان اؤلكه‌ده ياشايان میلّت‌لرين ديل، مدنيّت، شخصيت و هويّت‌لرينه حورمت‌سيزليك ائدیب فارسلاشدیرماق سیاستی يئرينه اوْنلارا سايغي و احترام گؤزو‌يله باخماق و اوْنلارین فرهنگي، مدني، اقتصادي، اجتماعي حقلريني اوْنلارا چاتديرماقلا حقيقي بيرليك و اتحاد ياراتماق مومكون‌دور.

دونيا ديللري ايله مقايسه‌ده ،دونيانين ان قانونلو ديللريندن اولان و دونيانين بير چوْخ بيليم يوردلاريندا تدريس اوْلان تورك ديليميز نه‌دن اؤز اؤلكه‌ميزده ان آزينليق (اقليت) ساييلان ارمني ديلي قَدَرده تدريس و تحصيل اولما حقّينه مالك دئيلدير؟

بو اؤلكه‌ده هر بير امكاني،يالنيز فارس ديلي اختياريندا قويماقلا و هر بير امتيازي يالنيز فارس میلّتی و فارس آدينا ثبت ائتمكله حقيقي و گئرچك بيرليگه و اتحادا چاتماق اولارمي؟

ايران كثيرالمله بير اؤلكه‌دير، بو كثير‌المله اؤلكه‌نين انكیشاف و آبادليغي اوندا ياشايان بوتون میلّت و قوميّت‌لرين حقلري‌نين قورونماسي و ياشاديغي يئرلرين و اوستانلارين آبادليغي ايله مومكون اوْلا بيلَر.

تهران شهرينده 20 تئلويزيون كاناليندان نئچه‌سي بو شهرين ان آزي ياري جمعيتي‌ني تشكيل ائدَن توركلرين ديلينده برنامه يايير؟

هانسي تئلويزيون سرياللاريندا تورك لهجه‌سي ايله دانيشان آدامي اجتماعي رفتاري بيلمه‌ين، يوْخسول و كوت بئيين يوخ، فيلسوف، پروفسور، دوكتور، مهندس و يوكسك مدنيّتلّي و يوخاري سويه‌لي شخصيّت رول‌لاردا گؤستريرلر؟

 مگر بو اؤلكه‌ده تورك فيلسوفو، تورك دوكتورو و تورك مهندسي يوخدورمو ؟

آذربايجان اوستانلاري‌نين راديو- تئلويزيونلاريندا نه‌دن برنامه‌لرين 85% فارسجا و قالان 15%ي ده اوزدن ايراق «فاذري!» ديلينده گئدير و بو باصطلاح آذری دیللی برنامه ‍‌لرین اتک یازیلاری نه دن تئلویزیون صحیفه‌سینده فارسجا یازیلیر؟!

نه‌دن درسي و غير درسي كیتابلاردا تورك سؤزو و تورك آدينا حورمتسيزليك و توهين ايله ياناشيرلار و نه‌‌دن آذربايجان اهاليسي آللاه بخش ائتميش گؤزل طبيعته مالیك اوْلاراق، بو منطقه‌ده ايش مركزلري‌نين يارانماماسيندان و اقتصادي دورومون آغيرليغيندان عالي تحصيل آلميش جاوانلاريندان توتدو عادي اینسانلارينا قَدَر ايش تاپماقدا تهران، اصفهان، شيراز، يزد، كرمان، مازندران و باشقا فارس ديللي شهرلرين يولوندا ديدرگين و سرگردان اولمالي‌ديرلار؟

نه‌دن ان آزی %40 ایران نفسونو تشکیل ائدن و ایراندا جمعیت باخیمیندان نسبي اكثريته مالیك اوْلان توركلر، حتّا ابتدايي مكتب‌لرده اؤز ديلينده درس اوخوماقدان محروم قالديغي حالدا فارس ديليني خارجه‌ليلره اؤيرتمك اوچون اجنبي اؤلكه‌لرين اؤيرنجي‌لرينه مملكت بودجه‌سيندن بورسيه وئرير و فارس ديليني اؤيرتمه‌يه تشويق ائديرلر و هر ايل فارس ديلي‌نين انكیشافينا گؤره سئمينارلار و توپلانتي‌لار قورولور و آغير هزينه‌لرله خارجي قوناقلاري بو سئمينار و توپلانتيلارا دعوت ائديرلر؟

نه‌دن 1400 ایلدن بو طرفه فارس دیلینده اؤزونه یئر آچان و هر کسین او سؤزلره عادت ائتدیگی و معناسینی بیلدیگی اسلامی- عربی کلمه‌لری قیراغا قویوب فارس معادلینی دوزلتمه‌یه میلّت جیبیندن هر بیر کلمه ‌سینه میلیونلار تومن پول خرجله‌نیر آمما بیزیم کؤرپه‌لریمیز ساوادلی اولماغا و علم قازانماغا دونیانین ان قایدالی – قانونلو دیلی اولان اؤز آنا دیلینده یوخ، آغزیندا دولانمایان فارس دیلینده درس اوخوماغا مجبوردور!

خارجي سياست‌ده‌ايسه اؤلكه مسئوللاري، فلسطين مظلوملاريندان حمايت ائده‌ركن تجاوزکار اسرائیل دؤلتینی رسمی دؤلت و اؤلکه تانیمادیقلاری حالدا نه‌دن ديلي، ديني، مذهبي، تاريخي و كئچميشي بيزله بير اوْلان اسلامي و شيعه اؤلكه‌سيني، يعني آذربايجان جمهوريتي تورپاقلاريني اشغال ائدَن تجاوزكار ارمنستان دؤلتي ايله دوستلوق و اقتصادي امكداشليق‌لاريني گونو- گوندن گوجلنديرير و بیر بیرلری ایله باجی – قارداشلیق ائدیرلر؟

بونلار و يوز‌لرله بونا اوخشار علت‌لر ‌و آذربایجان میلّتینه قارشی تحقیر، توهین و عدالتسیزلیکلر آذربايجان اهاليسيني 1385- جي ايلين خُرداد آييندا ايران قزئتي‌نين توكلره ائتديگي توهيني ايله خيابانلارا چكدي و گؤستردی کی، آذربایجانلیلار اؤلومه راضی اولارلار آمما تحقیر و توهینه، قول و برده کیمی یاشاماغا یوخ؛ اونلار سینارلار آمما گیلمزلر!!                                                                                                                    

دوباره امتحان کنید

اختراعات نوآورانه ترکیه در صنعت دفاع

گادتب: شرکت مهندسی سیستم‌های دفاعی ترکیه «FNSS» با نوآوری‌های همگرایانه، بسیاری از راه‌حل‌های تکنولوژیکی را …

امیرافشار افشاری: غارِ کرفتو، اثری باستانی در آزربایجانِ تاریخی

گادتب:  غار کَرَفتو، غاری باستانی و اثری تاریخی  که در صخره مرتفعی در شرق شهر …

دیدگاهتان را بنویسید