گادتب: ۱۳۸۵ – جی ایلین اوردیبهشت آیینین ۲۲ – سینده «ایران» قزئتینده تورکلر علیهینه چَکیلَن توهینلی کاریکاتورا اعتراض اوْلاراق ۸ گون سوْنرا و خورداد آیینین بیرینجی گونو، تبریز شهرینده، گنج اؤیرنجیلردن توتدو دانیشگاه اوستادی، معلّیم، ایشچی، تاجر و عادی کسبهیه قَدَر یوز مینلرله اینسان ، تبریز خیابانلاریندا توپلوم و مدنی اعتراضا ال آتاراق «ایران» گوندهلیگینده، اوتانمادان و حیاسیزجاسینا میلیونلارلا تورک اینسانینا سرت حؤرمتسیزلیگی قیناییب اؤلکه مسئوللارینا و بوتون دونیایا اعتراضلارینی بیلدیردیلر.
تبریز اهالیسینین شدتلی اعتراضیندان سوْنرا ، اورمیهلیلر، اوْندان سوْنرا «سولدوز» (نقده)، قوشاچای، زنجان، خیاوْ، موُغان ، اردبیل و آذربایجانین باشقا شهرلری و حتّا تهراندا یاشایان تورکلر بو عمومی اعتراضا قوشولاراق آذربایجان میلّتینه توهین ائدَنلره و شوونیستی دوشونجهنی «ایران» قزئتی یولو ایله یایانلارا اؤز غضبلرینی گؤستردیلر!
تأسفلر اوْلسون آذربایجانلیلارین بئله مدنی اعتراضلارینا و قانونی ایستَکلرینه گؤزلهنیلمَز سرت جاوابلار وئریلدی و اوْنلارین مدنی اعتراضلاری گؤزله نیلمز اولایلارا چئوریلدی و غیرتلی جاوانلاریمیز حق یولونداشهید اولدولار!
۱۳۸۵- جی ایلین خورداد آییندا آذربایجان شهرلریندهکی اعتراضلار گؤستردی کی، آذربایجانلیلار اؤز حقلرینی دریندن دوشونَرکن، بو حقلرین تاپدالانماسینا وتورکلرین نسبی اکثریت اوْلوب اقلیت حقوقوندان محروم قالماسینا بیتفاوت قالماغی و اوْنلارین هویّت و شخصیتلرینه توهین ائدَنلری جاوابسیز قویماغی جایز گؤرمورلر.
خورداد حادثهسی گؤستردی کی، آذربایجانلیلار دؤزوملو اینسان اولارکَن، اوْنلارین دؤزوملرینین حدّی- حدودو وار، اوْنلارین دؤزوم کاسالاری داشارسا اوندا داها اوْنلارین قاباغینی آلماق چتیندیر!
بو اؤلکهده هر بیر امکانی یالنیز فارسلارین و فارس دیلی اختیاریندا قویماقلا و هر بیر امتیازی یالنیز فارس آدینا ثبت ائتمکله حقیقی و گئرچک بیرلیگه و اتحادا چاتماق اولارمی؟
ایران کثیرالمله بیر اؤلکهدیر، بو کثیرالمله اؤلکهنین انکیشاف و آبادلیغی اوندا یاشایان بوتون میلّت و قومیّتلرین حقلرینین قورونماسی و یاشادیغی یئرلرین و اوستانلارین آبادلیغی ایله مومکون اوْلا بیلَر.
بو اؤلکه ده رادیو- تئلویزیوندا عاغیلا گَلمَز کیچیک موضوعلار بارهده میزگرد، کومیسیون، کونفرانس و سئمینار قورولور، لاکین مملکتده بؤیوک بیر درد اوْلان میلّی مسئلهنین حلّی اوچون ایکی نفرین میز آرخاسیندا اوتوروب دانیشماسینیندا شاهدی اولمامیشیق!
نهدن درسی و غیر درسی کیتابلاردا، رسمی و دولته باغلی مطبوعات و سوسیال شبکه لرده تورک سؤزو و تورک آدینا حؤرمتسیزلیک و توهین ایله یاناشیرلار و نهدن آذربایجان اهالیسی آللاه بخش ائتمیش گؤزل طبیعته مالیک اوْلاراق، بو منطقهده ایش مرکزلرینین یارانماماسیندان و اقتصادی دورومون آغیرلیغیندان عالی تحصیل آلمیش جاوانلاریندان توتدو عادی اینسانلارینا قَدَر ایش تاپماقدا اصفهان، شیراز، یزد، کرمان، مازندران،گیلان و باشقا فارس دیللی شهرلرین یولوندا دیدرگین و سرگردان اولمالیدیر؟
نهدن نسبی اکثریته مالیک اوْلان و ایراندا یاشایان تورکلر، حتّا ابتدایی مکتبلرده اؤز دیلینده درس اوخوماقدان محروم قالدیغی حالدا « فرهگستان زبان و ادبیات فارسی» و « بنیاد سعدی »مرکزلرینده، فارس دیلینده اؤزونه یئر آچمیش ۱۴۰۰ ایلیک اسلامی عربی «خلیج» ، «نسیم »، « تولید» کلمهلرینین هر بیرینه بیت المالدان و میلّت جیبیندن ۱۱ میلیون ۶۰۰ مین تومن خرجله ییب اونلاری « شاخاب» ، « آرام مه» و « فراوری» کلمه لرینه چئویرلر و فارس دیلینی خارجهلیلره اؤیرتمک اوچون هر ایل اجنبی اؤلکهلرین اؤیرنجیلرینه مملکت بودجهسیندن میلیاردلار تومن خرجلهییب بورسیه وئریر و فارس دیلینی اؤیرتمهیه تشویق ائدیرلر و فارس دیلینین انکیشافینا گؤره مختلیف سئمینارلار و توپلانتیلار قورولور و آغیر هزینهلرله خارجی قوناقلاری بو سئمینار و توپلانتیلارا دعوت ائدیرلر؟
۱۳۸۵- جی ایلین اعتراضلاری گؤستردی کی، آذربایجانلیلارین و ایراندا یاشایان باشقا تورکلرین اینسانی، مدنی و قانونی ایستَکلرینی اورا- بورا باغلی گؤسترمکله، اؤلکه نفوسونون ان آزی %۴۰ تشکیل ائدن ، یعنی ایران جمعیتی نین نسبی اکثریتینی تشکیل ائدن تورکلرین ان آزی فارس قدری اولان مادی- معنوی حقوقلارینا لاقید قالماق اولماز و بو حقوقلارین ان ابتدایی و ایلکینی آنا دیلینده ، یعنی آذربایجان تورکجه سینده ابتدایی دن توتدو بیلیم یوردونون ( دانیشگاهین) سونا قدر تحصیل آلماقدیر!