سیامک میرزایی: “بیزی یاشادان نه دیر”

گادتب: ماکس وئبئر “ائدیمی”، ذهنی بیر آنلامدان اولوشدوغونو بیلدیریر و “ائدیم” لری اوچ بؤلومه آییریر:

۱. دویومسال ائدیم، دویغویا دایاناراق، دوشونجه و اوسدان تام اوزاق اولان ائدیم

۰۲گله نکسل ائدیم، تکرارلانماقلارلا بلیرله نیر، او تکرارلاری ایسه توپلوم و توپلومون گله نک لری داها اؤنجه دن بلیرلتمیش دیر.

۰۳ اوسسال ائدیم، اینسانین اؤزگورلوک آلانی دیر، بیرئی بیلینج و اوس ده یرلندیرمه اساسیندا ائدیم ائدیر.

وئبئر اوسسال ائدیمی ده ایکی بؤلومه آییریر.

آماجا یؤنه لیک اوسسال ائدیم: بو ائدیمده دوغا و دونیادان اولدوقجا یارارلانماق، اقتصادی گلیشیم و ایره لیله مه هدف آلینیر. تام عینی و الوئریشلی هدف لره سؤیکه نه رک، دوغرولماسیندا بیلیم ان یاخشی توتالقا ساییلیر(راسیونالیستی دوشونجه)

ده یره یؤنه لیک اوسسال ائدیم: بو ائدیمده بؤیوک آرمان لار هدف آلینیر، اؤزگورلوک، عدالت، سئوگی، شرف و ساییرا

بوگونکو دونیادا تئکنیکا، ماشین، مادی یاشام اینسانلاری اؤز ائتگیسینده قویاراق هر بیر آتیلان آتدیمدا و ائدیلن ائدیمده مادی ده یرلرین یئری گؤرونمکده دیر.

آنجاق اونوتمایاق اینسانی اینسان ائدن و گرچک اؤزونه دؤنده رن، اونو آنلامدیران آرمان لار و اینسانسال آماجلار و

 ده یرلردیر.

بوگون بوتون چاتیشمازلیق لار، سورون لار و چتین لیک لره باخمایاراق هر بیر آذربایجان تورکو آنا دیل، کیملیک، وطن، آزادلیق، عدالت، اؤز مقدراتینی بلیرلتمه حاققی، دموکراتییا، اینسان حاقلاری، قادین حاقلاری، چئوره قوروماق، سئوگی، شرف و عزت له یاشاماغی یاشامینین بؤیوک بیر بؤلومونه قاتمالی دیر.

بو بیر اوسسال “ائدیم” دیر ایستر ده یره یؤنه لیک اولسون ایسترسه ده بیراز اوزون واده ده آماجا یؤنه لیک.

هر حالدا بیزی بیز ائدن و دوغرو وارلیغیمیزا قایتاران مساله بو آرمان لاری ایچسللشدیریب و اونلاری منیمسه مکدن عیبارت دیر.

هایدگئر دئییر اینسانین سئچیمی بیتدیگی زامان، اینسان اؤلور. بوگون بیزیم سئچیم حاققیمیز باشقالارین الینده دیر، باشقالاری گوجه دایاناراق اؤز ایستک، ماراق و چیخارلاری اساسیندا بیزی قوللانیر و بیزیم یئریمیزه قرار وئریر.

 گوج، اختیار و اؤزگورلوک الیمیزده دئییلسه سئچیمیمیزده الیمیزده اولمایاجاق. هاچان باشقالارین سلطه سیندن قورتاریب، اؤز گرچک وارلیغیمیزا قاییتدیق او زامان بیز اؤزگوروک و بوتون سئچیم لریمیز اؤز ایستک، چیخار و اینانج لاریمیز اساسیندا اولاجاق. یوخسا سلطه لر آلتیندا یاشاماق تام اؤلمک دئمک دیر. اونا گؤره هر بیریمیز اوسسال ائدیمله اؤز گرچک سئچیملریمیزه دوغرو یورومه لی ییک. بیزی یاشاداندا ائله بودور.