گادتب: بوگونه دک پایلاشدیغیم یازیلاریمدا باشقالارینی یئرسیزجهسینه قیناماقدان اوزاق دورماغا چالیشمیشام. آرتیق، گرکلی گؤرمهدیییم دورومدا، باشقالارینی یئرلی اولاراق دا قینامامیشام. اینانیرام بیز بوتون گوجوموزله وارلیغیمیزی قوروماق اوغروندا چالیشمالیییق. دئمک، گوجوموزو باشقالارین قیناماغینا ایشلتمک یئرینه وارلیغیمیزی قورویوب یاشاتماق اوغروندا ایشه توتمالیییق، دئیه دوشونموشم.
ائله بو باخیشیما گؤره، یئرسیز اولاراق هئچ کیمسهنین ده قولتوقلارینین آلتینا قارپیز قویمامیشام. آیدا ایلده بیرینی آلقیشلامیشامسا دا اونون گؤردویو ایشلرینین وارلیغیمیزی قوروماق اوغروندا نه قدر وئریملی هابئله نه قدر یارارلی اولدوغونو گؤز اؤنونه آلمیشام. دئمک، بوتون بو سورهلرده باشقالارینی قیناییب آلقیشلاماقدا اؤزومون شخصی ماراقلاریمدان اوزاق دورماغا چالیشمیشام.
سایین علیرضا فرشی جنابلارینی چوخدانلاردان بری تانیییرام. بوتون وارلیغی ایله آذربایجانیمیزین وارلیغینی قوروماق اوغروندا چالیشان بیر ایگیددیر. بوتون بو ایللرده، آغیر آغیر آجیلار، آجی آجی چتینلیکلر اونو بو توتدوغو یولدان اوساندیرا بیلمهییبلر. علیرضا فرشی جنابلاری یارادیجی بیر چالیشقاندیر. دئمک، او قاباقدان یارانمیش یئرینه دوشموش بیچیملره باغلانیب قالماییر. بلکه، وار اولان دورومو اینجهلهیرک، او دوروما اویغون اولاراق آددیم گؤتورور.
سؤزو گئدن چالیشقانیمیزین ایرهلی سوردویو وئریملی یئنیلیکلرین بیری ده “هر کنده بیر تورک کیتاب ائوی” آدلی کمپئینی یولا سالماقدیر. بوگونه دک بو کمپئینین آدی آلتیندا چوخلو اوجقار کندلریمیزده تورک کیتاب ائولری یارانیبدیر. بو کیتابلار آیری آیری قونلاردا یازیلمیش اولسالار دا اوست-اوستده وارلیغیمیزی قورویان کیتابلار ساییلیرلار.
آرا-سیرا اوردا-بوردا سایین علیرضا فرشی جنابلارینی آذربایجانیمیزین تانینمیش سیمگهسی ساییلان صمد بهرنگی کیمی داهی بیر شخصیت ایله توتوشدورماغا چالیشانلارا راست گلمیشم. بو توتوشدورما، هر بیر توتوشدورما کیمی، بو ایکی شخصیتیمیزین اورتاق بیر اؤزللییینی گؤز اؤنونه آلدیغینا گؤره، یئرسیز ساییلا بیلمز. صمد کند اوشاقلارینا “هر الینده دؤرد کیتاب”(1) آپاریردیسا، علیرضا کند اوشاقلارینا کارتون – کارتون کیتاب آپارماغی باشاریبدیر.
البته، هر بیر شخصیتی اؤز چاغینا هابئله اؤز یئرینه گؤره دیرلندیرمهلیییک! یوخسا بیر قونودا بیر بیرلرینه اوخشایان شخصیتلر باشقا قونولاردا بیربیرلریندن فرقیلی اولا بیلرلر. آرتیق، اونلار اوخشادیقلاری قونولاردا دا بیربیرلیندن فرقیلی اولا بیلرلر. بونا گؤره، من بوگونکو شخصیتلریمیزی قاباقکی شخصیتلریمیزله توتوشدورماغا قارشییام. آنجاق، تاریخه تاپشیریلمیش شخصیتلریمیزی قوتساللاشدیریب، یان یؤورهمیزده یاشایان شخصیتلریمیزی ایسه گؤرمزدن گلمهیه ده قارشییام. منجه صمد بهرنگی ده علیرضا فرشی ده آذربایجان تاریخینده تایسیز هابئله تکرارسیزدیرلار.
ی س:
1-
صمد گلیر گوله گوله، دؤشونده باخ قیزیل گوله
هر الینده دؤرد کیتاب، دؤندردی بیزیم دیله