گادتب: ایلک دؤنه توتوقلاندیغیمدا، دوستاغا گیردیییم گون، چوخ سئوینجک ایدیم. بو سؤزوم بوگونه دک توتاقلانمیش اولمایان اوخوجولارا غریبه گلسه ده، گونده نئچه دؤنه سورغولامایا آپاریلدیقدان سونرا تک آداملیق سئلوللاردا یالنیز باشینا بوراخیلان گونلری تجربه ائدن یولداشلارا چوخ دا غریبه گلمهیهجکدیر.
توتوقلانمیش بیر آدام اوچون هئچ نه گؤزآلتینا آلیندیغی گونلر کیمی، هر گون نئچه دؤنه سوروشدورولماق کیمی، تک آداملیق دار سئلوللاردا یالنیز باشینا بوراخیلماق کیمی آغیر دئییل، منجه! بو باخیمدان دوستاغا گیرمک، بیر تَهر اؤزگورلویه بوراخیلماق کیمی ساییلا بیلر. اؤزگورلوگ دئدیییمیز نهدیر کی؟! دوستاقلارین بارماقلیقلاریندان ائشیکده یاشایانلار اؤزگورمو ساییلیرلار؟
بیز هامیمیز دوستاقداییق دا! یالنیز، دوستاقلاریمیز بیربیریندن آیریدیر. بیریمیز تک آداملیق دار سئلوللاردا، بیریمیز یاتماغینا بیر پتو آچاجاق قدر بوش یئر تاپا بیلمهین قالابالیق دوستاقلاردا، بیریمیزسه آدی اؤزگورلوک دئییلن آنجاق اصیل دوستاق ساییلان بوغونتولو توپلوملاردا…
سانیرام، بو آچیقلامالاردان دولایی، دوستاغا گیردیییم گون سئوینجک اولدوغومون ندنینه گؤره، ذهنینیزده بیر فیکیرلر یاراتماغا و منه حق وئرمهیه باشلامیشسینیز! آنجاق، منیم اوگونکو سوینجیمین داها باشقا ندنی وارمیش.
من دوز قیزیمین دوغوم گونونون 5.جی ایل دؤنومونده دوستاغا گؤتورولدوم. ایلک دؤنه اولاراق قیزیمین دوغوم گونونه قاتیلا بیلمهدیییمدن دولایی، بئله عزیز گونونده اونون یانیندا اولوب اونا هدیه وئره بیلمهدیییمدن دولایی، قیزیمین دوغوم گونونده اونو باغریما باساراق بوگونو قوتلایا بیلمهمهیییمدن دولایی چوخ اوزگون ایدیم. آنجاق، بوتون بونلارا باخمایاراق، دوستاقدان ائویمیزه زنگ آچیب، قیزیما “دوغوم گونون قوتلو اولسون!” سؤزونو دئیه بیلهجکدیم. بو ایسه، منی چوخ سئویندیریردی!
ایندی بو یازینی یازاراق ساباح بو زامانین چیلله گئجهسی اولدوغونو دوشونورم. بیر ده، دوستاقداکی یولداشلاریمیزی دوشونورم. داها چوخ دا، سون اولایلارا گؤره گؤزآلتینا آلینمیش اولان و بوگونه دک هله دوستاغا گؤتورولمهین یولداشلاری دوشونورم. اونلارین عاییلهلرینی، اونلارین بالاجا اوشاقلارینی دوشونورم. اونلار ساباح بو زامان عائیلهلرینین یانیندا اولا بیلمهیهجکلر. آرتیق، دوستاقدا اولمادیقلارینا گؤره بیر زنگ آچیب اوزاقدان اوزاغا بو عزیز گئجهنی قوتلایا بیلمهیهجکلر بئله…
بوتون بونلاری دوشونرکن، ایچیمدن بو قیسا یازینین باشلیغینی باغیرماق گلیر: چیلله گئجهنیز قوتلو اولسون، گؤزو یولدا قالان عاییلهلر!