ادتاج اتحادیه دمکراتیک ترک آذربایجان جنوبی
گادتب-نين مطبوعات مرکزينه داخيل اولان معلوماتا گؤره، گونئي آذربايجان دئموکراتيک تورک بيرليگينين (گادتب) باشقاني سايين اژدر بي تاغيزاده آذربايجانلي ميللي فعال و صنعتچي عليرضا آمانبگلينين دونياسيني دييشمه‌سي مناسيبتيله باش ساغليغي مئساژي ياييب.
باش ساغليغي مئساژينين بير حيصه سينده دئييلير:
“داشيديغي ميللي عقيده سينه گؤره، فارس-موللا رئژيمينين تضييقلري ايله قارشيلاشيب، مجبوراً وطنين مستقيل حيصه سي- آذربايجان رئسپوبليکاسينا سيغينان آذربايجانلي فعال عليرضا آمانبگلي گنج ياشلاريندا وفات ائديب. بو آجي خبر هر کس کيمي بيزي ده اوزدو.
مستقيل آذربايجانينا سيغينماق مجبوريتينده اولوب، لاکين سيويل اؤلکه‌لره سيغينان شخصلره وئريلن بوتون حقوقلاردان محروم اولان و فاکتيکي اولاراق آذربايجان رئسپوبليکاسيندا سورگون استاتوسوندا ياشايان گونئيليلر کيمي عليرضا آمانبگلي ده احتيياجلار ايچريسينده اؤلکه‌دن چيخماق استاتوسونا ماليک اولماماقلا سورگون شراييطينده چورويوب دونياسيني دگيشدي. مينلرله باشقالارينا وئريلن استاتوس اونسوز دا آذربايجان رئسپوبليکاسيندا بارماق سايدا قالان و آذربايجاني جانلاريندان چوخ سئون گونئيليلر اوچون ده اگر وئريلسيدي، بلکه‌ده عليرضا آمانبگلي ده راحات خاريجه گئديب معاليجه آليب و واختسيز دونياسيني دگيشمزدي. حاضيرکي بو آرزو اولونماز شرايط ايسه بيزيم ايسته‌ييب، ايستمه یيميزدن آسيلي اولماياراق موستقيل آذربايجانيميزين بو مرحله تاريخينده قارا لکه کيمي دگرلندیریله بیلر. بو ايسه بیزی اوزن و آرزو ائتمه‌ديگيميز مسئله‌دير. اومید ائدیریک جانیمیزدان چوخ سئودیگیمیز آذربایجان دؤولتی اؤز سئویملی اؤولادلارینا لاییقینجه صاحب چیخسین.
گادتب هر زامان آذربايجان دؤولتيني يئگانه موستقيل دؤولتيميز حساب ائده‌رک، دستکله‌ييب و دستکليه‌جک. آذربايجان رئسپوبليکاسيندا واختسيز دونياسيني دگيشن گونئيلي فعال و صنعتچي عليرضا آمانبگلي يه ايسه رحمت و ياخينلارينا صبر ديله‌ييريک.
اژدر تاغيزاده
گونئي آذربايجان دئموکراتيک تورک بيرليگينين (گادتب) باشقاني
