ادتاج اتحادیه دمکراتیک ترک آذربایجان جنوبی
گادتب: ۲۱ آذر یئنی ۲۱ آذری گوزله ییر
آذر آیی نین ۲۱-ی میللتیمیزین ایراده سیله یارادیلان میللی حؤکومتیمیزین قورولماسینین ایلدونومودور. شانلی ۲۱ آذرین ایلدؤنومو بو ایل ائله بیر زامانا راسلاماقدادیرکی، وطنیمیز آذربایجاندا و ایران دئییله ن یئرده و ائله جه ده منطقه میزده کؤکلو ده ییشیکلیکلرین شاهیدی اولاجاییق . یالنیز گونئی آذربایجانیمیزدا دئییل، عمومیتله ایران دئییله ن میللتلر دوستاغیندا اسیر میللتلر ایستیقلالیت اوغروندا جیدی ساواش (موباریزه) آپارماقدادیرلار.
بو دا تئهراندا اوتوران عیرقچی تئروریست حاکیملرین و اونلارین اربابلاری نین اوره یینه ولوله سالمیشدیر. بونا گوره ده اوز باسقی و تئرورلارینی آرتیراراق، هر بیر دانیشان دیلی کسمه یه چالیشیرلار. آمما بونلارین هئچ بیری کوله لییه، ایستثمارا و مستملکه چیلییه قارشی باشلانان ساواشی دوردورانمایاجاقدیر. میللتیمیز باشقا خالقلارلا بیرگه آزادلیغا، اؤزگورلویه اولان اینامینی ایتیرمه یه جکدیر. میللتیمیز بو اینامی ۷۵۰۰ ایللیک غرورلو تاریخیندن آلدیغی بیر ایرث دیر. میللتیمیزین آند ایچمیش دوشمنلری بو غرورلو میللتی پارچالا حاکمیت ائت سیاستی نین اوستونده ن ۲۰۰ ایل کئچسه ده بو سیاست بوگونده دوام ائتمکده دیر. ائله گونئی آذربایجانی اراک، همدان، زنگان، قزوین، انزلی، آستارا، بیجار و اردبیل … کیمی اوستانلارا بؤلمک و سون گونلرده حتا غربی آذربایجانی «اورمیه اوستانی» آدلاندیرماق سوزونو ائتدییمیز مستملکه چی سیاستین گؤسترگه سیدیر. عین زاماندا میللتیمیزین بو آند ایچمیش دوشمنلری نین بو چیرکین عمللرینین آراخاسیندا اوزون وعده لی آسیمیلاسیون، یعنی میللتیمیزی اوز ایچینده اریتمه سیاستی یاتیر. اونلار بیزیم وارلیغیمیزین، میللی کیملیک و هوییتیمیزین رمزی اولان آذربایجان و آذربایجانچیلیغی هدف آلمیشلار. یعنی اونلار بو هوییتی و آذربایجانچیلیق دوشونجه سینی و فیکرینی الیمیزدن آلماغا چالشیرلار. و بو ایالتلرده گئت ـ گئده یئرلی اهالی نین ایستروکتورونو ده ییشمکله فارسچیلیغی و ایرانچیلیغی بئیینلره سوخماق ایسته ییرلر. آمما میللتیمیزین آیدین و ضیالیلاری آییق، گنج لری و قورتولوشچولاری تئهران رئژیمی نین بو موزی عمللرینی و اونلارین هدفلرینی یاخشی باشا دوشور. بونا گؤره ده میللی قورتولوش ساواشینا اینامی داهادا آرتیر. اونلار اؤز آرالاریندا اولان سلیقه فرقلیکلرینی، شخصیت پرستلییی، یئرلی بازلیغی، شهرت طلب لییی، بیر یانا قویوب، میللتیمیزین دوشمنلرینه قارشی بیر یوموروق کیمی بیرلشیب ، قول ـ قولا گیریب موباریزه صفلرینی سیخلاشدیرماقدادیرلار.
ایستیقلالییتیمیزین سمبولو اولان اوچ رنگلی بایراغیمیزی اؤزلریله داشییرلار. ایستیقلالییته، آزادلیغا اینام اوقده ردیرکی، لازیم گلدیکده سیلاح اله آلاراق اوشاغیندان ـ یاشلی سینا قده ر، قیزلی-اوغلانلی فارس ایشغالچیلارینا قارشی سون نفسه قده ر ساواشاجاقدیر. آزادلیغیمیزین، وارلیغیمیزین سمبولو و سیمگه سی اولان میللی بایراغیمیزی مستقیل آذربایجانیمیزین هر بیر بوجاغیندا دالغالاندیراجاقدیر. او گون قوزئی آذربایجانیمیزدا اولدوغو کیمی، گونئی آذربایجانیمیزدا یادلارین حاکمییتینه، آغالیغینا سون قویولاجاقدیر.
عشق اولسون میللی قورتولوش اوغروندا ساواشانلارا
وار اولسون گونئی آذربایجانیمیزین ایستیقلالییتی
یاشاسین شانلی ۲۱ آذرین اولو خاطیره سی
