گادتب: 28 مای آذربایجان جمهوریتینین یارانماسینین ایل دؤنومودور. آذربایجان تورک میللتی تاریخ بویو بؤیوک ایمپئراتورلوقلار قورسا دا، معاصر دؤورده صیرف محمد امین رسولزادهنین سعیی ایله 1918-جی ایل مای آیینین 28-ده مودرن و دموکراتیک آذربایجان جمهوریتینی قورموشدور.
روسلارلا قاجار دؤولتینین محاربهسی نتیجهسینده پارچالانمیش آذربایجانین یالنیز قوزئی حیصهسینده موستقیل آذربایجان جمهوریتی قورولسا دا آذربایجانین گونئی حیصهسی اولماقلا بؤیوک حیصهلری اسارت آلتینا سالینمیشدیر. 1918-جی ایل مای آیینین 28-ده تورک دونیاسی و عمومیتله شرق عالمینده ایلک دموکراتیک، پلورالیست و دونیوی آذربایجان دؤولتینین یارانماسی پارچالانمیش آزربایجانین بوتون حیصهلرینین دؤولتیدیر و اصلینده محمد امین رسولزادهنین قوردوغو آذربایجان خالق جمهوریتی آذربایجان تورک میللتینین چوخ عصرلیک دؤولتچیلیک تاریخینین پارلامئنتلی جمهوریت فورماسیندا چاغداش دؤورده داوامیدیر. تصادفی دئییلدیر کی، محمد امین رسولزادهنین قوردوغو آذربایجان خالق جمهوریتی هم ده گونئی آزربایجانین موستقیللیگینی برپا ائدیب آذربایجان تورک جمهوریتی قورماسینا ان ایدئال مودئل کیمی گوندمدهدیر.
آذربایجان خالق جمهوریتی آوروپانین دموکراتیک دگرلری ایله شرق مدنیتینین خصوصیتلرینی بیرلشدیرن یئنی بیر دؤولت و جمعیت نومونهسی اولموشدور. 23 آی قیسا بیر زاماندا، حیاتا کئچیریلن تدبیرلرله بنزری گؤرونمه میش کؤکلو دییشیکلیکلره ایمضا آتان دؤولت، اؤزللیکله موستقیل دؤولتچیلیگیمیزین اساسلارینین یارادیلماسی و گلهجک اینکیشاف یولونون معین لشدیریلمهسی باخیمیندان موهوم آددیملار آتمیشدیر. آذربایجان خالق جمهوریتی قیسا مدت عرضینده دؤیوش قابیلیتینه مالیک آذربایجان اوردوسونو تشکیل ائتمیش، دؤولت قوروجولوغونون بوتون ساحهلرینده ثمرهلی ایش آپاریلمیش و یئنی، میللی طلبلره و دموکراتیک پرینسیپلره اویغون اولان دؤولت اورقانلاری قورولموشدو. موستقیل آزربایجانین بایراغی، هیمنی و دیگر دؤولت آتریبوتلاری آذربایجان خالق جمهوریتینده قبول ائدیلمیش، آزربایجانین تاریخینده ایلک اونیوئرسیتئت – باکی دؤولت اونیوئرسیتئتی یارادیلمیش، تحصیلین میللیلشدیریلمهسی، یئنی تدریس مؤسسیسهلرینین آچیلماسی ساحهسینده آذربایجان تورک میللتینین سونراکی مدنی ترقّیسی اوچون اساسلی زمینه چئوریلن بیر سیرا اؤنملی ایشلر گؤرولموشدور. محمد امین رسولزاده آذربایجان تورک میللتینین معاصر دؤور دؤولتچیلیگینین و دؤولتینین بانیسیدیر.
آزربایجان خالق جمهوریتینین واریثی کیمی موستقیل آذربایجان جمهوریتی تکجه قوزئیلی سویداشلاریمیزین دئییل، بوتون دونیا آذربایجانلیلارینین دؤولتیدیر. بو دؤولت گونئی آذربایجاندا مستقیل دؤولتین و بوتؤو آزربایجانین یارانماسی اوچون دایاق نقطهسی و ایدئیا قایناغیدیر. گونئی آذربایجان دموکراتیک تورک بیرلیگی (گادتب) آذربایجان خالق جمهوریتینین داوامی اولان موستقیل آذربایجان جمهوریتنی دونیا آذربایجانلیلارینین موستقیل دؤولتی حساب ائدیر و جمهوریتین تورکچولوک ایدئاللارینا صداقتله گونئی آزربایجانین موستقیللیگی و بوتؤو آزربایجانین یارانماسی اوغروندا فعالیت گؤسترمه یی اؤزونه شرف بیلیر. آذربایجان تورکلری گونئی آذربایجاندا گونئییمیزین میللی قورتولوشونو یالنیز و یالنیز ایستیقلال و جمهوریت ایداره اصولوندا گؤردوکلری اوچون خالق جمهوریتینی اؤزلرینه نومونه گؤتورموشلر.
اژدر تاغیزاده
گونئی آذربایجان دموکراتیک تورک بیرلیگی (گادتب) باشقانی