ادتاج اتحادیه دمکراتیک ترک آذربایجان جنوبی
گادتب: 20 یانوار فاجعه‌سی معاصر دؤورده آذربایجان میللتی‌نین تاریخینه عموم میللی حوزن گونو کیمی دوشسه ده، اصلینده موستقیللیگی و آزادلیغی اوغروندا آیاغا قالخمیش بیر میللتین موستملکه‌چی ایمپئریا اوردوسو قارشی‌سیندا مثلسیز قهرمانلیق تاریخی یازماسی ایدی.
1990-جی ایل یانوارین 19-دان 20-نه کئچن گئجه سووئت اوردوسو و تانکلاری آزادلیغی اوچون آیاغا قالخمیش الی یالین آذربایجان میللتی‌نین اوزرینه هوجوما کئچدی. فاجعه زامانی باکیدا و قوزئی آذربایجانین دیگر بؤلگه‌لرینده 146 شخص اؤلدورولدو، 744 آدام آغیر خسارت آلدی، 841 نفر ایسه قانونسوز اولا‌راق حبس ائدیلدی. سووئت اوردوسونون عملیاتلاری نتیجه‌سینده 200 منزیل، ائو، شخصی و دؤولت املاکی داغیلدی. لاکین آذربایجان میللتی سووئت اوردوسونا غالیب گلدی.
20 یانواردا قوزئی آذربایجاندا میللتیمیز ثبوت ائتدی کی، الی یالین بیر میللت دونیانی قورخویا سالان سووئت ایمپئریاسی و روس قوشونونا سینه گریب، غالیب گله و موستقیللیگینی برپا ائده بیلر. فارس ایمپئریاسیندان قات-قات گوجلو اولان روس ایمپئریاسینین تانکلارینین قارشی‌سینا چیخان الی یالین میللتیمیز گؤستردی کی، دموکراتیک یوللا دا ایشغالچی‌لاری یئرینده اوتورتماق اولار.
میللتیمیزین قوزئی آذربایجاندا دونیانین ایکی بؤیوک گوجوندن بیرینین تانکلاری قارشی‌سیندا دایانیب مثلسیز قهرمانلیق گؤسترمه‌سی، تکجه قوزئی آذربایجانین موستقیللیک تاریخینده قهرمانلیق صحیفه‌سی کیمی تاریخه دوشمه میش، هم ده موستقیللیگی اوغروندا مباریزه آپاران گونئی آذربایجانا و عمومیتله تورک دونیاسینا بؤیوک درس اولموشدور.
بو گون گونئی آذربایجاندا دا میللتیمیز اؤز موستقیللیگی و آزادلیغی اوغروندا 20 یانوار شهیدلری‌نین یولو ایله گئتمه‌یه مقام گؤزله ییر و هئچ بیر قووه‌نین میللتین ایراده‌سی قارشی‌سیندا داوام گتیرمیه جه یینه اینانیر.
اژدر تاغیزاده
گونئی آذربایجان دموکراتیک تورک بیرلیگی (گادتب) باشقانی
