گادتب: 21 آذر حرکاتی نتیجهسینده قورولان آذربایجان میللی حکومتینده سید جعفر پیشه وری دئییردی “اؤلدو وار دؤندو یوخدور”. آذربایجان میللی حکومتینین هر طرفدن شووینیست و جینایتکار فارس رئژیمی و اونون حمایهچیلرینین تضییقی و هجومو نتیجهسینده سقوطوندان سونرا آذربایجانین دوشمنلری بو سؤزو لاغا قویاراق “اؤلدو ده وار ایمیش دؤندو ده” دئییردیلر. لاکین باشا دوشموردولر کی، پیشه وری بو سؤزو تکجه بیر دؤنم اوچون یوخ، بلکه بو گون اوچون ده دئییرمیش. بو گون بو حرکات داوام ائدیر و گؤرونور کی، آذربایجان تورک میللتی اؤز موستقیللیک سئوداسیندان دؤنمهییب. بو گون آذربایجان تورک میللتی موستقیللیک اوغروندا مباریزهسینی داوام ائتدیریر.
21 آذر حرکاتی صینفی مباریزه یوخ، میللی حرکات ایدی. حرکاتین باشچیسی پیشه وری دفعهلرله تکرار ائدیردی کی، بو حرکات میللی حرکاتدیر، صینفی حرکات دئییل. آذربایجان تورکلری بیر-بیرینه قارشی موجادیله آپارمیرلار. بلکه فارس شووینیزمینه قارشی موباریزه آپاریب، آذربایجان تورکجهسینده مکتب، اونیوئرسیتئت، مطبوعات و رادیونون آچیلماسینا چالیشیرلار و بونو دا ائتمیشدیلر.
21 آذر حرکاتی ایله گونئی آذربایجانا یئنی روح گلدی. آزاد مطبوعات، فیکیر آزادلیغی و عمومیتله آذربایجانا آزادلیق گلدی. بو دا عیرقچی و ایرتیجاعچی فارس شووینیزمینی، ائلهجه ده اونلاری دستکلهییب حاکمیته گتیرن باشدا اینگیلتره اولماقلا دونیا موستملکهچیلرینی قورخویا سالدی. بئله کی، دونیا موستملکهچیلری موسکوا کونفرانسیندا آذربایجانین مختاریت قازانماسینا بئله ایجازه وئرمهدیلر. بونون آردیندان ایسه تئهران رئژیمی بوتون آنلاشمالارا رغمن آذربایجانا هوجوما کئچیب، آذربایجان تورکلرینه قارشی دهشتلی سویقیریم تؤرهتدی.
پیشه وری باشچیلیغی ایله 21 آذر حرکاتی ایران آدلانان یئرده دموکراتیا، فئدئرالیزم و پارلامئنتاریزمین سونونجو تشببوسو ایدی. تئهرانین ایرتیجاعچی فارس رئژیمی و اونون حمایهدارلاری گؤستردیلر کی، بو بؤلگهده و قوندارما ایران آدی آلتیندا اولان اراضیده آذربایجان تورک میللتینه هئچ زامان اؤز مدنی و اینسانی حقوقلارینا چاتماغا اجازه وئرمه یه جکلر. آذربایجان اسارتده اولدوغو آنادک پیشه وری دئمیشکن “تئهران آباد اولاجاق، آذربایجان برباد اولاجاق”. پیشه وری دئییردی کی، اگر بیز ایستکلریمیزه نایل اولماساق تئهرانلا ویدالاشاجاغیق.
21 آذر حرکاتینین باشلانغیجی و فاجعه وی سونو گؤستردی کی، آذربایجان میللتی یالنیز اؤزونه گوونمهلیدیر. میللت اؤزونه گوونیب، ایرادهسینی سرگیلهسه هئچ بیر ایمپئریانین حمایهسینه ده مؤحتاج اولماز. بیز اؤز میللتیمیزه گوونملیگیک. بیزیم لیدئرلریمیز محمد امین رسولزاده، پیشه وری، ابولفضل ائلچی بَی و آتاتورک ده گؤستردی کی، گوج تورک میللتیندهدیر. آذربایجاندا دا آذربایجان تورک میللتی ایراده ائدنده اؤز مجلیسینی، اؤز دؤولتینی و اؤز اوردوسونو یارادیر. سرحدلرینه، سینیرلارینا اؤزو صاحب چیخیر. بو گون 21 آذر حرکاتینین عنعنهسینه دایاناراق، آذربایجانین گونئیینین تکجه بیر یولو قالیب. او دا اؤز ایستیقلالینی الده ائدیب و آذربایجان موستقیل دؤولتینی یاراتماقدیر. بو حرکاتین بیزه تکجه بیر مئساژی وار. او دا فارسا، فارس شووینیزمینه اینانمادان یالنیز اؤز گوجوموزه دایانیب آذربایجانی آزاد ائتمک. بیر سؤزله پیشه وری دئمیشکن بو میللته موستقیللیگینی الده ائدنه دک نه اؤلدو وار نه دؤندو.
گونئی آذربایجان دموکراتیک تورک بیرلیگی (گادتب)