ادتاج اتحادیه دمکراتیک ترک آذربایجان جنوبی
گادتب: یئرآدلاری، دیل، تاریخ و جغرافیانین واحید سنگریدیر.
آنادیلی گونونده نمایشه قویولان صحنه‌لر، قارچیچک‌لری کیمی هر یئردن گؤیرن بیر میللتین میلللی عزم و اراده‌سی ایدی کی بو حرکت کئشگه تکجه بیر گونده قالماییب و بوتون گونلره سئچراسین.
آنادیلیمیزین اساس سنگرلریندن بیری یئرآدلاری‌دیر و یئرآدلاری دیل، تاریخ و جغرافیانین واحید سنگریدیر. هله ۱۳۷۷ ایدی و پروفسور زهتابی‌نین اسکی تاریخ کیتابی‌نی اوخوماغا باشلامیشدیم. کیتابین لاپ اووللرینده، ۳۳.جو صحیفه‌ده بو جمله‌لری اوخودوم:
ائل، طایفا و خلق‌لر یاشادیقلاری محیط، یئر، اؤلکه و منطقه‌نین داغ، دره، چای، گؤل، مئشه و سایره‌سینی، ائله‌جه‌ده قوروب یاراتدیقلاری کند، قالا، شهرلرینی اؤز دیل‌لرینین کلمه‌لریله آدلاندیرمیش و آدلاندیریرلار. دئمک شفاهی شکیلده آغیزدان – آغیزا زمانه‌میزه گلیب چاتمیش، ائله‌جه‌ده تاریخی اثرلردن معلوم اولان اسکی یئر و جغرافی آدلاری او دؤورلرین دیلیندن یادگار قالمیش ان محکم سند و مدرک‌لردیر و اونلاری خلقین دئدیگی کیمی دقتله قیده آلیب ساخلاماق، اونلارین اوزه‌رینده ایشله‌ییب، آچیقلاماق آن اؤنملی و واجب میللی وظیفه‌لریمیزدن بیریدیر.
زهتابی‌نین بو سؤزلری هله‌ده قولاغیمدا سسله‌نیر و اینانیرام کی یئرآدلارینی یازیب ساخلاماق میللی وظیفه‌لریمیزدن بیریدیر. هله سونرالار و ۸۰.جی ایلده زهتابی‌نین ایسلاما قدر کیتابی‌نین ۶۲.جی صحیفه‌سینده بو جمله‌نی ده اوخودوم:
یئرآدلاری گؤز به‌به‌گی کیمی، ساده خلق دیلینده تلفظ اولدوغو کیمی، قورونوب ساخلانمالی، دقیق توپلانمالی و آراشدیریلمالیدیر. ایران دؤولتی‌نین بو آدلاری عینادلا ده‌ییشدیرمه‌یه چالیشماسی هئچ ده علت‌سیز دئییلدیر.
بیلیرم کی هامی‌نیز یئرآدلارینین اهمیت‌نی بیلیرسیز آما بعضن اونودور بعضن جیدییه آلمیرسیز و هره‌میزی بیر یئرلرده ایته‌له‌مک لازیم‌دی. من بوردا سیزلره اؤزومون بیر تجروبه‌می دئییرم: سون زامانلاردا اوستاد کریمی منی بو قونودا بیر آز ایته‌له‌دی و من عزیز دوستوم مهدی فیض‌الهی‌نین یاردیمی ایله، تکجه اؤز کندیمیزدن ۱۵۰ دن آرتیق یئرآدی توپلادیق و سیز ده بو ایشی تجروبه ائدین لطفن. اؤزو ده کندیمیزدن توپلادیغیمیز آدلارین ایچیندن نه آدلار وار؛ هر بیر توکی مین یوسف کنعانه برابر.
او آدلارین بیر سیراسینی یاخیندا سیزلره تقدیم ائده‌جه‌یم، فقط لوطفن زهتابی‌نین بو وصیتینی اونوتمایین: یئرآدلاری گؤز به‌به‌گی کیمی، ساده خلق دیلینده تلفظ اولدوغو کیمی، قورونوب ساخلانمالی، دقیق توپلانمالی و آراشدیریلمالیدیر. گؤز به‌به‌گی کیمی…
