İranda İnsan haqları fəalları siyasi məhbuslara görə bəyanat yayıb

GADTB: Bir qrup mülki və insan haqları fəalları edamların dayandırılmasını, siyasi və ideoloji məhbusların qeyd-şərtsiz azad edilməsini və ETTELAAT qüvvələrinin təzyiqlərinə son verilməsini tələb ediblər.

Bununla bağlı yayılan bəyanatın müəllifləri, Evin həbsxanasının məhbuslarının başqa yerlərə köçürülməsindən sonra bir çox məhbus ailələrinin yaxınlarının vəziyyətindən və harada saxlanılmasından xəbərsiz olduqlarını bildiriblər.

İnsan haqları fəallarının bəyanatının bir hissəsində deyilir: “Evin həbsxanasının ümumi palatalarından olan məhbuslar Tehran ətrafındakı həbsxanalara köçürülüb və ağır, qeyri-insani və dözülməz şəraitdə saxlanılır.

Həmçinin, əvvəllər mühafizə kameralarında və ya karserdə saxlanılan məhbusların vəziyyəti ilə bağlı rəsmi məlumat verilməyib”.

Bəyanatı tanınmış insan haqları fəalları imzalayıb.