ادتاج اتحادیه دمکراتیک ترک آذربایجان جنوبی
گادتب: بو کاغذ پارچاسی ۱۳۸۰/۶/۲۴ تاریخینه عاییددیر و اورمو گؤلونون ائشیدیلمهین هارای سندیدیر. آما من بو یازیدا، بو روزنامهنین بیرینجی تیتریندن یوخ، بلکه ایکینجی تیتریندن دانیشماق ایستهییرم کی او گونلر «مصلحت نظام» باشچیسی اولان رفسنجانی، ارک قالاسینین قورونما ضرورتیندن دانیشیب.
تاریخچیلره گؤره، تبریزین اورتاسیندا، صاحب آباد آدلی بؤیوک بیر مئیدان سالینمیشدی. اوتوز مین تاماشاچی توتان بو مئیداندا آغ قویونلو حؤکمداری اوزون حسنین قارشیسیندا هر جمعه گونو قورد اویونو نمایش ائتدیریلیردی. شاه اسماعیل بو مئیداندا قوپوق اویونو تشکیل ائدیردی. بو اویوندا یئره باسدیریلمیش هؤندور بیر آغاجین اوستونه قیزیلدان دوزلدیلمیش آلما قویاردیلار. او قیزیل آلمانی، آت چاپا- چاپا اوخ ایله ووروب سالان شخص، یاریشین غالیبی ساییلاراق اؤدول آلاردی. ونیزیالی سیاح باربارو و ونیزیالی تاجیر آنونیم، هابئله فیرانسالی عالیم شاردئن بو تؤرنلری یاخیندان گؤروب و اونلار حاقدا بیلگیلر وئرمیشلر.
میلادی ۱۳۲۱جی ایلده، ایتالیانین پئردئنون شهریندن تبریزه گلمیش اودریک، بو شهرین ثروت و تجارتی حاقدا بئله یازیر: تبریز شاهانه شهردیر. تجارت باخیمیندان دونیادا تبریزدن یاخشی شهر یوخدور. چونکو یئر اوزونده ائله مال تاپیلماز کی، تبریز آنبارلاریندا همین مال اولماسین. اولیا چلبی تبریزده مین یئتمیش اعیان سارای اولدوغونو بیلدیرمیش و اونلاردان امرهقیز محلهسینده اللهوئردیخان سارایی، ری محلهسینده روستم خان سارایی، اوزون حسن مچیدی یانیندا پیر بوداق سارایینین آدلارینی قئید ائتمیشدیر.
ارک قالاسی بو محتشم شهرین اورتاسیندا و همهشه بیر اوزوک قاشی کیمی پارلاییردی. بو زنگین شهر، او بازارلار و او اعیانلارین ماللاری طبیعی اولاراق چاپولچولاری تحریک ائدیب تبریزه یورومهیه هوسلندیرردی. آما ارک قالاسی شهر قوروقچولارینی باغرینا باسیب، بو سئحیرلی شهره یوروینلرین هامیسینا «گئری دؤن» دئیهردی.
آما آخیر حملهده، ملکوتیلر و رفسنجانیلر، شهری عوضینه شهری قورویان قالانی هدف توتوب و غالیب گلدیلر. تبریز هنر دانشگاهینین اوستادلاری، بهرام آجورلو و علی نعمتی بابایلو جنابلارینین یازدیقلارینا گؤره، ۱۳۷۹ دان ۱۳۹۱ قدر سورن عملیاتلاردا، ارکین بوتون قاجاری بینالاری سؤکولوب یوخ ائدیلدی و بو عملیاتلار، دقیقن رفسنجانینین او «قوروما ضرورتی» و اصلینده داغیتما فرمانی ایله اوست اوسته دوشور و قالاسیز یئرده شهر ده ییخیلار، گؤل ده قورویار.
«ابراهیم رشیدی»
