ادتاج اتحادیه دمکراتیک ترک آذربایجان جنوبی
گادتب: تهرانین ائوین حبس خاناسیندا ساخلانیلان اوچ هفتهدن چوخدور آجلیق آکسیاسی کئچیرن میللی فعاللار او جملهدن ودود اسدی و طاهر نقوینین عمومی وضعیتلری پیسلشیب.
آلدیغیمیز معلوماتا گوره آجلیق آکسیاسی سورجینده، فعاللارین عمومی حاللاری دفعهلرجه آغیر وضعیتده حبسخانانین طب منطقهسینه کوچورولوب.
اونلارین معالجهلری ایچون حبس خانادان قیراق خستهخانایا یئرلشدیرمهلرینه بئله ایذین وئریلمهییب.
بیلدیینیز کیمی کئچن گونلرده آذربایجانین باشقا فعاللاری بیانات یایاراق بیان ائدیبلر اگر مسئوللار آجلیق آکسیاسیندا اولان دوستلاریمیزین حاقلی،طبیعی و قانونی ایستکلرینه جاواب وئرمهسهلر بیزده او جملهدن( عبدالعزیز عظیمی قدیم،محمود اوجاغلو و آیاز سیف خواه) اونلارا حمایت ائتمک ایچون آجلیق اعتصابینا قاتیلاجاییق.
اونلار بارده چیخاریلان حبس جزالارینا محکمه پروسهسینین عدالتسیزلیینه و تهلوکهسیزلیک ناظیرلیینین اونلارا قارشی قارا یاخمالارینا اعتراض ائتدیکلرینی بیلدیریبلر.
بو بارهده فعاللاریمیز ساختا اتهاملارلا او جوملهدن “میللی تهلوکه سیزلییه قارشی البیر اولماق” حکومته قارشی تبلیغات آپارماق” “جاسوسلوق” و بئله بیر گولونج اتهاملارلا اوز اوزه قالیب و اوزون مدتلی حبسه محکوم اولوبلار.
عمومیتله ائوین زندانیندا اولان میللی فعاللاریمیزین بو بارهده اورک دولو محبتلی دوستلوغا مالیک اولان روحیهلری، البیر و اونلارین قولدور حاکملرین قارشیسیندا گوجلو موقاومت گوسترمه و دایانمالاری آذربایجان میللی حرکتینده ان بویوک سئویندیریجی و تقدیره لاییق بیر حال دیر.
بیر میللتی آرادان آپارماق اوچون ایلک اونجه او میللتین دیلینی، تاریخینی، تاریخی شخصیتلرینی و یئر آلتی-یئر اوستو طبیعی ثروت لرینی آرادان آپاریرلار.
گونئی آذربایجاندا میللی-مدنی فعاللار هر زامان بو بیر طرفلی سیاسته قارشی همیشه اعتراض ائدیبلر، ایندی اونلاری دوتوب “حکومته قارشی تبلیغات” “جاسوسلوق” و” میللی تهلوکهسیزلییه ضربه وورماغا اوچون توپلاشماق و البیر اولماق” دا گوناهلاندیریب، و اونلاری اوزون ایللیک حبس جزاسینا محکوم ائتمک چوخ گولونج و غیر حقیقی دیر، بیزده آذربایجان بیر وطنداشی اولاراق بو عزیز دوستلارین آجلیق آکسیاسینا دستک وئریب و بوتون آذربایجان خالقیندان دا ایستییریک بو عزیزلره دستک وئرسینلر نییهکی آجلیق آکسیاسی سیاسی محبوسون سون سلاحی دیر…
