ادتاج اتحادیه دمکراتیک ترک آذربایجان جنوبی
گادتب: گونئی آذربایجان دئموکراتیک تورک بیرلیگی (گادتب) ایرانین فارس موللا رئژیمینین آذربایجان رئسپوبلیکاسینا قارشی تئررور هوجومونو پیسلهمکله باغلی بیانات یاییب. بیاناتدا دئییلیر:
ایرانین تئررورچو فارس رئژیمینین آذربایجان رئسپوبلیکاسینا قارشی حیاتا کئچیردیگی تئررور هجومونو قطعیتله پیسله ییریک.
معلوم اولدوغو کیمی، ایرانین فارس تئررورچو رئژیمی آذربایجان رئسپوبلیکاسینین آیریلماز ترکیب حیسهسی اولان ناخچیوان موختار رئسپوبلیکاسینا دؤرد پیلوتسوز اوچوش آپاراتی ایله هوجوم حیاتا کئچیرمیشدیر. بو هوجوم نتیجهسینده پوآلار ناخچیوان هاوا لیمانی اطرافینا دوشموش، اینفراستروکتورا خسارت یئتیرمیش و بیر نئچه مولکی شخص یارالانمیشدیر.
گونئی آذربایجان دئموکراتیک تورک بیرلیگی (گادتب) اولاراق بو چیرکین و تخریباتچی هوجومو قطعیتله پیسله ییر و ایرانین تئررورچو موللا رئژیمینی شدتله محکوم ائدیریک. بو هوجوم بیر داها گؤستریر کی، ایرانین فارس ایرتیجاچی رئژیمی بؤلگهده ثابتلیگی پوزماق و گرگینلیگی آرتیرماق سیاستیندن ال چکمیر.
اومید ائدیریک کی، بو حادثهلر ایران داخیلینده یاشایان خالقلارین، خصوصیله گونئی آذربایجان تورکلرینین، بو ایشغالچی و رئپرئسسیو رئژیمدن آزاد اولماسی ایله نتیجهلنهجک. گونئی آذربایجانین آزادلیغی و پارچالانمیش تورپاقلاریمیزین بیرلشمهسی رئگیوندا صلحون، تهلوکسیزلیگین و ثابیتلیگین محکملهنمهسینه تؤحفه وئره بیلر.
بیر داها خاطیرلادیریق کی، ایرانین فارس ایرتیجاچی و تئررورچو رئژیمی اؤز ایفلاسا اوغرامیش حاکمیتینی قوروماق اوچون بؤلگهنی گئنیش میقیاسلی محاربهیه سوروکلهمکدن چکینمیر. بو رئژیمین مقصدی رئگیوندا بؤیوک، حتی بئین الخالق بیر موناقیشه یاراداراق اؤز ضعیفلهین حاکمیتینی قوروماقدیر.
بیز آچیق شکیلده بیان ائدیریک کی، گونئی آذربایجان دئموکراتیک تورک بیرلیگی (گادتب) اولاراق هر زامان آذربایجان رئسپوبلیکاسینین یانینداییق. آذربایجان رئسپوبلیکاسینا قارشی ائدیلهن هر هانسی هوجوم بوتون دونیا آذربایجانلیلارینا، او جملهدن ۵۵ میلیونلوق بؤیوک آذربایجان خالقینا و گونئی آذربایجانا قارشی یؤنلمیش بیر هوجومدور.
آذربایجان رئسپوبلیکاسی اوزون ایللردیر کی، ایرانلا موناسیبتلرینده قونشولوق پرینسیپلرینه، قارشیلیقلی حؤرمته و بئین الخالق حقوقا صادق قالیب. لاکین ایران رئژیمی بو موناسیبتلردن سوء-ایستیفاده ائدرک آذربایجانی تخریباتلارلا قارشیدورمایا چکمهیه چالیشیر.
بیر داها بیان ائدیریک کی، ایرانین فاشیست و تئررورچو رئژیمینین بو آددیمی رئگیون اوچون جدی تهلوکه یارادیر و بو سیاست نتیجه ده رئژیمین اؤزونو داها بؤیوک بحران و تهلوکهلرله اوز-اوزه قویاجاق.
گونئی آذربایجان تورکلری بو جور تهدیدلر قارشیسیندا سوسمایاجاق و تئررورچو موللا رئژیمینه قارشی مباریزهسینی داوام ائتدیرهجک.
همچینین آنا یوردوموز آذربایجان و آتا یوردوموز تورکیهنین هر زامان یانیندا اولدوغوموزو بیر داها وورغولاییریق.
حؤرمتله، گونئی آذربایجان دئموکراتیک تورک بیرلیگی (گادتب)
