ادتاج اتحادیه دمکراتیک ترک آذربایجان جنوبی
گادتب: آوسترالییا آذربایجان آسوسیاسییاسینین پرئزیدئنتی و گونئی آذربایجان دئموکراتیک تورک بیرلیگینین بئین الخالق علاقهلر دئپارتامئنتینین صدری سایین میکائیل بی اویتا بئین الخالق اجتیماعیت و دونیا مئدیاسینا مراجعت عنوانلاییب. مراجعتی اولدوغو کیمی تقدیم ائدیریک:
بئین الخالق اجتیماعیته و دونیا مئدیاسینا مراجعت
گونئی آذربایجانین پایتاختی تبریزین تهلوکهسیزلیگی ایله باغلی جدی ناراحاتلیق
گونئی آذربایجانین تاریخی و مدنی مرکزی اولان تبریز و عمومیتله گونئی آذربایجان سون دؤورلرده آرتان گرگینلیک و تهلوکهلر قارشیسیندا قالماقدادیر. ایران حاکمیتینین اوزون ایللردیر داوام ائدن آذربایجانلیلارا قارشی آیری-سئچکیلیک سیاستی، اینسان حقوقلاری ساحهسینده یاراتدیغی جدی محدودیتلر و خالقیمیزین بوتون میللی-مدهنی حقوقلارینی کوبود شکیلده پوزماسی درین ناراحاتلیق دوغورموشدور.
دونیا اجتیماعیتی بیلمهلیدیر کی، بیز — میلیونلارلا آذربایجان تورکونون — هئچ بیر خالقلا، هئچ بیر میللتله و هئچ بیر دؤولتله دوشمنچیلیک نیتیمیز اولماییب. بیزیم مباریزهمیز هر هانسی خالقا قارشی دئییل؛ مقصدیمیز گونئی آذربایجاندا یاشایان آذربایجان تورکلرینین دیل، مدنیت، کیملیک و فوندامئنتال اینسان حقوقلارینین تانینماسی و قورونماسیدیر.
اوزون ایللر عرضینده گونئی آذربایجاندا آذربایجان تورکلری آنا دیلینده تحصیل ایمکانلارینین محدودلاشدیریلماسی، مدنی حقوقلارا قویولان مانعهلر، سوسیال و اقتصادی چتینلیکلر، سیاسی تضییقلر و موختلیف آیری-سئچکیلیک حاللاری ایله اوزلشمیشدیر.
بیز اینانیریق کی، خالقلار آراسیندا صلح، قارشیلیقلی حؤرمت و دیالوق بوتون پروبلئملرین حلی اوچون اساس یولدور. گونئی آذربایجان تورکلری بؤلگهیه محاربه، زوراکیلیق و قارشیدورما گتیریلمهسینی دئییل، عدالتلی، دینج و بئین الخالق حقوقا اویغون حل یوللارینین تاپیلماسینی ایسته ییر.
بئین الخالق تشکیلاتلاری، دونیا مئدیاسینی و اینسان حقوقلاری قوروملارینی گونئی آذربایجاندا خالقین سسینی ائشیتمهیه، بؤلگهدهکی اینسان حقوقلاری وضعیتینه دقت یئتیرمهیه و صلح یولو ایله حل ایستیقامتینده سعیلری دستکلهمهیه چاغیریریق.
دونیا بیلمهلیدیر: گونئی آذربایجاندا آذربایجان خالقینین طلبی دوشمنچیلیک دئییل، اؤز موستقیللیک حقوقونا، میللی-مدهنی حقوقلارینا، آزادلیقلارینا و لیاقتینه حؤرمت ائدیلمهسیدیر. بیزیم چاغیریشیمیز قارشیدورمایا دئییل، صلحه، عدالته و خالقلار آراسیندا قارشیلیقلی حؤرمته اساسلانیر.
میکائیل اویتا
گونئی آذربایجان دئموکراتیک تورک بیرلیگی (گادتب)
بئین الخالق علاقهلر دئپارتامئنتینین صدری
