Molla rejimi 88 gündür azərbaycanlı körpəyə Anız adına görə doğum haqqında şəhadətnamə vermir

GADTB: Əcəbşir rayonunda molla rejimin VVAQ idarəsi 88 gündür azərbaycanlı ailənin övladına türk mənşəli Aniz adı ilə doğum haqqında şəhadətnamə verməkdən imtina edir. Bu vəziyyət ailəni bir sıra ciddi problemlərlə üz-üzə qoyub.

Uşağın atası Əli Aşiqi “#Balamin_Adu” kampaniyasının @dan.magazin səhifəsinə bildirib: “Qızım 4 iyun 2026-cı il tarixində dünyaya gəlib və adını Aniz qoymuşuq. Bu ad türk dilində ‘xatirə, yadigar və əfsanə’ mənalarını ifadə edir və oğlumuz ‘Araz’ın adına da uyğundur. Lakin Əcəbşir VVAQ idarəsinin əməkdaşları doğum haqqında şəhadətnamənin verilməsinə qarşı çıxaraq bildiriblər ki, ‘bu ad VVAQ sistemində yoxdur və etibarlı sayılmır’. Daha sonra seçim üçün “Paniz” də daxil olmaqla bir neçə oxşar fars adı təklif ediblər.

Bildirdim ki, bir adın sistemdə olmaması onun etibarsız olduğu anlamına gəlmir. Siz həmin adı sistemə əlavə edə bilərsiniz. Məgər bu gün sistemdə mövcud olan bütün adlar əvvəldən orada qeydiyyatda olub? Biz türk xalqıyıq və öz dilimizə, mədəniyyətimizə uyğun olaraq övladımıza türk adı qoymaq hüququmuz var. Lakin bunu qəbul etmədilər.

Nəhayət, vəkil tutaraq hüquqlarımızı məhkəmə yolu ilə müdafiə etməyə başladıq. Məhkəmə də sentyabrın 12-nə iclas təyin edib. Hazırda uşağımın doğum haqqında şəhadətnaməsi olmadan 88 gün keçib. Övladımızın doğumunu sevinclə qeyd edə biləcəyimiz günlər əvəzinə, bu müddət narahatlıq, qeyri-müəyyənlik və məhkəmə çəkişmələri içində keçib.

VVAQ idarəsinin uşağımı sənədsiz saxlaması bizə çoxsaylı problemlər yaradıb. Hazırda hökumətin əhalinin artımını təşviq etmək üçün verdiyi uşaq doğum müavinəti kimi müxtəlif dəstək proqramları mövcuddur. Lakin uşağımın doğum haqqında şəhadətnaməsi və milli identifikasiya nömrəsi olmadığı üçün bu imkanlardan yararlana bilmirik. Əslində, əsas məqsədimiz bu yardımları almaq deyil, lakin çox ciddi problemlərlə üzləşirik. Uşağımı həkimə apararkən çətinlik yaranır, tibbi sığortadan məhrumdur, hətta ona ayrılan süd qarışığı payını belə ala bilmirik”.

Qeyd olunur ki, dil canlı və dinamik bir hadisədir və hər il yeni sözlər və adlar yaranır. VVAQ idarəsi də hər il yüzlərlə “yeni yaradılmış fars adını” icazə verilən adlar siyahısına əlavə edir.

Türk dili də canlı və dinamik dildir və türkdilli vətəndaşlar digər vətəndaşlar kimi övladlarına yeni və yaradıcı türk adları vermək hüququna malikdirlər. Buna görə də bir türk adının VVAQ sistemində mövcud olmaması həmin adın etibarsız və ya qadağan edilmiş olması üçün əsas sayıla bilməz.