GADTB Güney Azərbaycan Demokratik Türk Birliyi
GADTB: ABŞ Nümayəndələr Palatasının spikeri Mayk Conson bildirib ki, Donald Tramp administrasiyası İran İslam Respublikası ilə hazırkı qarşıdurmanı “davam edən müharibə” kimi qiymətləndirmir və hərbi əməliyyatları başa çatdırmağa çalışır. Onun sözlərinə görə, qarşıdurma hazırda yekun mərhələdədir və onun tezliklə nəticələnəcəyini düşünür.
Conson şənbə günü, 28 Şəhrivər tarixində “This Week on Capitol Hill” proqramında bildirib ki, hazırkı danışıqların əsas istiqamətlərindən biri Hörmüz boğazının kommersiya gəmiçiliyi üçün açıq saxlanılmasıdır. O əlavə edib ki, İran İslam Respublikası Hörmüz boğazından keçən gəmilərin hərəkətinə maneələr yaradır və bu su yolunun açıq qalması bütün dünyanın maraqlarına xidmət edir.
ABŞ Nümayəndələr Palatasının spikeri bildirib ki, NATO üzrə ABŞ müttəfiqləri və ərəb ölkələri də daxil olmaqla, ən azı 25 ölkə Hörmüz boğazının açıq saxlanılması səylərinə qoşula bilər.
Conson həmçinin “Epik Qəzəb” əməliyyatını uğurlu adlandırıb və bildirib ki, əməliyyatın məqsədi İran İslam Respublikasının nüvə bombası əldə etmək imkanlarını məhv etmək olub.
O, Konqresdəki demokratların ABŞ prezidentinin hərbi səlahiyyətlərini məhdudlaşdırmaq istiqamətindəki təşəbbüslərinə qarşı çıxıb. Conson bildirib ki, hazırkı şəraitdə Konqres ABŞ Silahlı Qüvvələri ilə bağlı Baş Komandanın qərarlarına müdaxilə etməməlidir.
