گادتب-نين مطبوعات مرکزينه داخيل اولان معلوماتا گؤره، آوقوست آيينين 30-دا تورکيهنين 30 آوقوست – ظفر بايرامي موناسيبتيله آوستراليانين سيدنئي شهرينده طنطنه لي مراسيم تشکيل اولونوب. مراسيمه گادتب بين الخالق دئپارتامئنتينين صدري و آوستراليا آذربايجان آسوساسياسينين پرئزيدئنتي سايين ميکاييل اويتا و گادتب ماليه، ائله جه ده قادين مسئلهلري دئپارتامئنتينين صدري سايين سيما خانيم قاتيليبلار.
کئچيريلن مراسيمده سايين ميکاييل بَي اويتا چيخيش ائتميشدير. سايين ميکاييل بَيين چيخيشيني تقديم ائديريک:
من ميکاييل اويتا، آوستراليا آذربايجان آسوساسياسي بيرليگي و گونئي آذربايجان دئموکراتيک تورک بيرليگينين تمثيلچيسي اولاراق، بيرينجي هامينيزي سالاملاييرام. خوش گلميسينيز. اؤزلليکله باش کونسولوموز سايين مليح کارارال و تورک دایانیشما مرکزی، ائله جه ده ديگر حؤرمتلي قوناقلاريميزا تشککور ائديرم.
30 آوقوست 1922-جي ايل-97 ايل بوندان اول قاضي مصتافا کمال آتاتورکون باش کوموتانليغيندا مئيدان ساواشيندا دونيانين گوجلو دؤولتلري بيزيم تورک تورپاقلاريميزا تورکيهيه هوجوم ائدنلر و تورکيهني محو ائتمک پارچا-پارچا ائتمک، بؤيوک تورک ميللتيني ديزه چؤکورمک ایسته یي ايله تورکيه ايله نئچه جبهه دن ساواشا گيرديلر.آما او گون تورک تورپاقلاريني مودافيعه ائدن شرفلي، غئيرتلي بؤيوک تورک ميللتي جانيني، عزيزلريني فدا ائتديلر و چتينليکلره دؤزن بو قهرمان ميللت قاضي موصتافا کمال آتاتورکون ليدئرليگي ايله ساواشدي، اونلار 750 مين شهيد وئرمکله ظفره نائيل اولدولار.
بو ظفر بوتون 300 ميليونلوق تورک ميلتلرينين (55 ميليون آذربايجان تورک ميللتي، قازاخيستان، اؤزبکيستان، تورکمنيستان، قيرغيزيستان، قوزئي کيبريس، دوغو تورکوستان و ديگر تورک ميلتلري) و تورک دؤولتلرينين ظفريدير. بو گون موناسيبتيله هامينيزي کوتلاييرام.
آما بو گون تأسوفله يئنيدن تورک ميللتي و تورپاقلارينا قارشي بعضي پيس و چيرکين سيياستلري مشاهيده ائديريک. آما بو دفعه داها تورپاقلاريميزي آلماغا جسارت ائده بيلميرلر. تورپاق آلماق اوچون پ ک ک آنادولودا و بعضي ائرمني تئروريستلري قاراباغدا، فارس شووينيستلري، ائله جه ده بعضيلري کورد آدي ايله گونئي آذربايجاندا تورک تورپاقلارينا گؤز تيکيبلر.
بونلار 30 آوقوست 1922 ايل ظفريندن درس آلماليديرلار. تورک ميلتي اوز تورپاقلاريني، وارليغيني نئجه مودافيعه ائتمهليدي چوخ اييي بيلير. تورک ميلتي باريش، صلح سئون بير ميللتدير هئچ بير ميللت ايله هئچ پروبلئمي يوخدور. بوتون ميلتلره سايغي دويوروق. ان گؤزل ايقتيصادي سياسي کولتورل علاقه يه اينانيريق. آما تورپاغيميزا، وارليغيميزا گؤز تيکهنين آنادولودا و يا آذربايجانين قوزئيي و گونئيينده گوجوموزو ايييجه گؤسترريک و قاراباغيميزي ايشغالچي و جينايتکار ائرمنيستانين ايشغاليندان آزاد ائدهجه یيک و پ ک ک تئرروريست قوروپونا قارشي بيز آذربايجان تورکو اولاراق، بوتون وارليغيميزلا تورکيهنين ميللت و دؤولتينين يانينداييق.
وار اولسون بؤيوک تورک و آذربايجان اوردوسو.
ظفر بايراميني تورک دونياسينا اورکدن تبريک دئييب قوتلويورام
ساغ اولون وار اولون.