ادتاج اتحادیه دمکراتیک ترک آذربایجان جنوبی
گادتب: قاپیلار قاپالیدیر ، گؤروشلر یاساق.
نه سئودیکلرینله گؤروشه بیلیرسن ، نه ایستهدیکلرینه ال اوزادا بیلیرسن.
هارداسا اوزو ماسکالی بیر اینسان گؤردویونده تانیمیرسان.
شوبههلی باخیشلارینی اوستونه سریب ، بؤیروندن سوووشورسان.
کرونا دئییل ، یالقیزلیقدیر کی بیر طاعون کیمی نشر اولور. اینسانلاری اؤز تنهالیقلارینا قاپادیر و هانسیسا بیر مئساژی وئرمک ایستهییر ؛ ائی گئجه گوندوز دورمادان اورا بورا قاچیب چالیشان اینسان ، خودخواهلیغیندا بوغولوب ، اؤز من”لرینی بئجرتمهیه چالیشان بشر ، بیر نئچه گون اؤزونه گل. دایان تؤشکونو دَر.
بیراز دوشون ، عؤمرونون قیسا اولدوغونا باخ ، اؤلومون نقدر یاخینلیغیندا اولماسینا و اؤلوم سفیرینین عادیل اولماسینا.
بو منم ؛ تکنولوژی آللاهلارینین بوتلارینی سیندیران بالتا ، ایییرمیبیرینجی عصرین سورعتلی ایزدیهامیندا گؤزه گؤرونمهین وارلیق ، کی اینسانلیغین اؤلومونو هامیزا خبر وئریرم. بدندن بدنه ، رییهدن رییهده. نفسدن نفسه.
منسیز ده سیز اینسانلیغی اؤلدوروبسوز. منسیز ده سیزین گؤروشلریز یالاندیر. منسیز ده اوزو ماسکالیسیز.
حقیقی اوزلریزی گیزلهدیب ، منسیز ده بیربیریزه هر ییرتیجی حیواندان خطرلی جانلیلارسیز.
بیراز دایانین ، دالین تنهالیغیزا ، اللریزی هر آن یویوب ، اوزلریزه ماسکا وورون.
بو موقددس و آجی گئرچهیه تمیز یاناشمالیسیز.
