ادتاج اتحادیه دمکراتیک ترک آذربایجان جنوبی
گادتب: 20 یانوار آذربایجان تورک میللتینین ایچغالچی روس اوردوسونا قارشی قهرمانلیق و دیره نیش سیموولونا چئوریلمیش تاریخیمیزین فخر ائدیلمه‌لی صحیفه‌لریندن بیری‌دیر. 20 یانواردا آذربایجانیمیزین قوزئیینده موستقیللییه جان آتان آذربایجان تورک میللتی بیر داها روسون وحشی‌لیگی و آذربایجانا فلاکت گتیردیگینی موشاهیده ائتدی. 20 یانوار فاجعه‌سی آذربایجان تورک میللتینین تاریخی یادداشینی بیر داها تزه‌له‌دی و آذربایجان تورکو 20 یانواردا اولدوغو کیمی سون ایکی یوز ایله یاخین بیر دؤوروده آزربایجانین هر یئرینه روسون آنجاق فلاکت، سویقیریم، پارچالانما گتیردیگی و آذربایجان اراضی‌لری‌نین ائرمنی‌لر و روسیایا پیلانماسینا سبب اولدوغونو گؤزدن کئچیردی. بو گون ده آذربایجان اوروسونون ایشغال ائدیلمیش آذربایجان اراضی‌لرینی ایشغال‌دان آزاد ائدرکن روسون بو مقدس وظیفه‌یه مانع اولدوغو و بیر داها صلح مراملی آدی ایله یئنی‌دن آذربایجانا قارشی ایشغال سیاستینی داوام ائتدیریگی گؤز اؤنونده‌دیر.
روس‌لار تکجه آزربایجانین قوزئیینده دئییل، آزربایجانین گونئیینده ده بؤیوک فلاکت‌لره سبب اولوبلار. تکجه اورمیا، سالماس و خوی بؤلگه‌لرینده 200 مین آذربایجان تورکو روس‌لارین بیر باشا تشکیلاتلاندیریب سیلاحلاندیردیغی ائرمنی-آیسورلارین الی اله 1918-جی ایلده سویقیریمین قوربانی اولدولار. تبریز و آزربایجانین باشقا بؤلگه‌لرینده ده یوزلرله آذربایجان اوغلو اؤلدورولوب، آزربایجانین ثروت‌لری تالانمیش‌دیر. هئچ بیر دؤورده روس آذربایجان تورکونه فلاکت و بدبخت چی لیک‌دن باشقا هئچ نه وئرمه میش‌دیر.
1990-جی ایل یانوارین 19-دان 20-نه کئچن گئجه ده سووئت-روس اوردوسو و تانکلاری آزادلیغی اوچون آیاغا قالخمیش الی یالین آذربایجان تورک میللتینین اوزرینه هوجوما کئچمیش‌دیر. فاجعه زامانی باکیدا و قوزئی آزربایجانین دیگر بؤلگه‌لرینده 146 نفر اؤلدورولدو، 744 آدام آغیر خسارت آلدی، 841 نفر ایسه قانون‌سوز اولا‌راق حبس ائدیلدی. سووئت اوردوسونون عملیات‌لاری نتیجه‌سینده 200 منزیل، ائو، شخصی و دؤولت املاکی داغیلدی. لاکین آذربایجان میللتی سووئت-روس اوردوسونا غالیب گلدی.
20 یانواردا قوزئی آذربایجاندا آذربایجان تورک میللتی ثبوت ائتدی کی، الی یالین بیر میللت دونیانی قورخویا سالان سووئت-روس ایمپئریاسی و روس قوشونونا سینه گریب، غالیب گله و موستقیل‌لیگینی برپا ائده بیلر. فارس ایمپئریاسین‌دان قات-قات گوجلو اولان روس ایمپئریاسینین تانک‌لارینین قارشی‌سینا چیخان الی یالین میللتیمیز گؤستردی کی، دئموکراتیک یوللا دا ایشغالچی‌لاری یئرینده اوتورتماق اولار.
میللتیمیزین قوزئی آذربایجاندا دونیانین ایکی بؤیوک گوجوندن بیرینین تانکلاری قارشیسیندا دایانیب میثیلسیز قهرمانلیق گؤسترمه‌سی، تکجه قوزئی آزربایجانین موستقیل‌لیک تاریخینده قهرمانلیق صحیفه‌سی کیمی تاریخه دوشمه میش، هم ده موستقیل‌لیگی اوغروندا موباریزه آپاران گونئی آذربایجانا و عمومیتله تورک دونیاسینا بؤیوک درس اولموش‌دور.
گونئی آذربایجان دئموکراتیک تورک بیرلیگی (گادتب) 20 یانواری آذربایجان تورک میللتینین روس ایشغالچی‌لارینا قارشی مقاومت گونو کیمی ده یرلنیریب و بو گون ده آزربایجانین قوزئیینده صلح مراملی آدی ایله گلمیش روس قوشونونا عینی مؤوقعنین سرگیلنمه‌سینی دوزگون حساب ائدیر. آزربایجانین گونئیینده ایسه بو گون آذربایجان تورک میللتی اؤز موستقیل‌لیگی و آزادلیغی اوغروندا 20 یانوار شهیدلرین‌دن ایلهام آلا‌راق موباریزه‌سینه داوام ائتدیر و اینانیریق کی، هئچ بیر قوه میللتیمیزین ایراده‌سی قارشیسیندا داوام گتیره بیلمه‌یه‌جک.
اژدر تاغی‌زاده
گونئی آذربایجان دئموکراتیک تورک بیرلیگی (گادتب) باشقانی
