ادتاج اتحادیه دمکراتیک ترک آذربایجان جنوبی
گادتب: بو شهر چوخلو آدلیم اینسانلارا بئشیک اولوبدور. آذربایجان دئموکرات لیدری شیخ محمد خیابانی، یاشیل‌لارین محصور لیدری میرحسین موسوی، شرقین بیرینجی دراماتوروگو فتحعلی آخوندزاده، آذربایجان رئیس جمهورو ابولفضل ائلچی‌بی و ایران رهبری سیدعلی خامنه‌ای بو شهرین سایسیز آدلیم بالالاریندان نئچه نمونه‌لریدیر.
بو قدر آدلیم اینسان آناسی هله ده اؤز دوغرو آدینی بیر کیچیک تابلودا گؤرمه‌یه حسرت‌دیر. خومنا بو شهرین اصیل آدی و قومنا اونون قدیم فورماسی‌دیر.بو لوغتین نه اولدوغونو بیلمک اوچون اونونلا ایلیشگیده اولان باشقا آدلاری گؤزدن کئچیرمه‌لییک.
موغانین اونگوت بؤلگه‌سینده کلنتر آدلی بیر داغ وار. بو داغدان باش آلیب گلن خومناو چایی، گوده کهریز، قاراخان بیلی و زئیوه کندلرینی سوواریب، زئیوه قوزئیینده سامبیر چایینا قاریشیب، دیکداش کندینده قارا سویا تؤکولوب نهایت آرازا آخیر.آرازین ساغ چیینیده، قاراداغین اوجقار بوجاغیندا یاتان شهرین آدی خومارلی دیر.بلکه آغ‌چای آخارقاسیندا یاتان خومام شهری ده بو آدلا ایلگیلی‌دیر. اوجان ماحالیندا قوملار آدلی بیر داغ وار. ایران مرکزینده قوم آدلی شهر اونون قوم چایی، قوم دریاچه‌سی و قوم دوزلاغی هامی اوچون تانیشدیر. قوم-ون یاخینلیغیندا قوموجان آدلی بیر شهر وار. بو آد دؤولت آداملاری طرفیندن کمیجان قلمه آلینیبدیر. اصفهاندا یئرلشن قومشا شهری کئچمیشده قمشه یازیلسا دا هله‌لیک شهرضا آدلانیبدیر. خوانسار آدییلا تانینمیش شهر بیر چوخ لهجه‌لرده خومسار دئییلمکده‌دیر. بوتون قایناقلار سمنان‌ین قدیم آدینی قومش، قومس و قوم‌ائش کیمی گؤستریر. هانسی آنلاماز خائین‌لر خومنا، قوم، قوموجان، خومسار، قومشا و قومئش کیمی آنلاملی و گؤزل لوغت‌لرین یئرینه کؤکو بللی اولمایان خامنه، قم، کمیجان، خوانسار، شهرضا و سمنان-ی اوتوردوب او آدلارین معنوی ایلگی‌لرینی همه‌شه‌لیک قیرماغا چالیشیبدیر؟
قوم، تورکجه‌ده شئن و ماسا آنلامیندادیر. بیز، قند حبه‌سی بؤیوکلوکده اولان داشلارا خوم دئیردیک. بئش داش اوینایاندا قازاندیغیمیز رتبه‌لره خوم دئییب سایاردیق. «من سنه بئش خوم». آدی وئریلن شهرلرین هامیسی قومسال و قوملوقدور. بوندان باشقا، قوم، سویو اؤزونه چکیب باتیران قاب و گؤل آنلامیندا دا ایشلنیب‌دیر. یانیمیزدا مدرسه‌یه آپاردیغیمیز سو قابینا قوم-قوما دئییردیک. ائلات، دوه بوغازینا باغلانان تر قابینا قوم دئییر. آدی وئریلن شهرلرین هامیسی، قوروموش گؤل‌لر و باتمیش چایلار یانیندا تیکیلیبدیر. بودا چوخ ماراقلی‌دیر.
ابراهیم ساوالان
