ادتاج اتحادیه دمکراتیک ترک آذربایجان جنوبی
گادتب: بیرینجی پرده: صحنه اؤرتویو قالدیریلینجا استبداد قورخولوق‌لاری بیربیر صحنه‌یه گیریرلر. بئله‌لیک‌له، گؤروجولری قورخونج، استبدادی حتی نظامی بیر دؤولتین ایش اوسته گلمه‌سیندن قورخودورلار!
ایکینجی پرده: صحنه اؤرتویو قالدیریلینجا، ماکیاژ اوتاغیندا دوداق‌لارینا یالانسی بیر گولومسه‌مه چکیلمیش اولان استبداد کوکلالاری، قورخودان ال-آیاق‌لارینی ایتیرن گؤروجولرین قارشیسینا چیخاراق، اونلارا آیدین بیر گله‌جه‌یین موشتوسونو وئریرلر!
اوچونجو پرده: گؤروجولرین چوخو بو “گولومسه‌مه” لرین یالان اولدوغونو آنلاییرلار! آرتیق، آلدیق‌لاری موشتولارین دا ساده‌جه بوش بیر سؤز اولدوغونو دفعه‌لرجه سیناییبلار. بونا باخمایاراق، بیرینجی پرده‌ده گؤردوک‌لری قورخونج چهره‌لرین قورخوسوندان بو بزنمیش کوکلالارین پئشینه دوشمک زوروندا قالیب اونلاری آیاق اوسته آلقیشلایاراق سئچکی اویونو-نون صحنه‌سینه گیریب، بو اویونون سون صحنه‌سینی تکمیل ائدیرلر!
پرده آرخاسی: استبداد قورخولوق‌لاری ایله استبداد کوکلالارینی ایسته‌دییی کیمی بزه‌ییب، صحنه‌یه چیخاردان استبداد یؤنتمنی، آرتیق اؤز ایسته‌دییینه چاتمیش‌دیر! صحنه‌یه چیخان ایستر قورخولوق اولسون ایستر کوکلا اولسون، هر حالدا ایپین اوجو اونون الینده‌دیر! بئله‌لیک‌له، ایکی اوچ ایل سونرا یئنه‌ده تکرار اولماق شرطی ایله، صحنه اؤرتوک‌لرینی ساللایاراق بو گولونج اویونا سون وئریر!
سؤزلوک:
سئچکی: انتخابات / اویون: نمایش، نمایشنامه/ قورخولوق: مترسک/ ماکیاژ اوتاغی: اتاق گریم/ کوکلا: اویونجاق، عروسک خیمه‌شب‌بازی، بازیچه/ موشتو: مژده (موشتولوق: مژدگانی)/ سیناییبلار: تجربه ائدیبلر/ یؤنَتمَن: کارگردان
