ادتاج اتحادیه دمکراتیک ترک آذربایجان جنوبی
گادتب: رازهای سرزمین من» رومان‌ینین بیر پارچاسیندا، آمریکالی ستوان بیلتمور، تبریزلی تیمسار شادان‌دان سوروشور کی نییه سنین اوشاغین اولمور؟ شادان دئییر: «آتدان دوشموشم. ایللر اؤنجه آذرین ایگیرمی‌بیرینده، ارتش جشن‌ینده آت اوینادیردیم؛ آتیم منی قالخیزیب یئره چیرپدی. اوگوندن آوروپا دوکتورلرینه ده گئتمیشم اوشاغیم اولمور کی اولمور. خالق آراسیندا دئییرلر حاققیدی؛ آذرین ایگیرمی‌بیرینده آت اوینادانین آللاه نسلین کسر.»
رضا براهنی‌نین بو جومله‌لری، مرحوم ملکوتی‌نی یادیما سالیر. اونون عؤمرونون آخیر اون ایلی چوخ پیس کئچدی. اوغلانلاری باش وورموردو؛ هردن قیزی‌نین اوغلو (یانیلمیرامسا آدی هادی ایدی) گلیب ایشلرینی گؤروردو؛ امام جومه اولدوغو گونلرده باشینا توپلانان آداملارین هئچ بیری اونا یاخینلاشمیردی. براهنی دئمیشکن بلکه او دا، ارک حاققیندا مرتکیب اولدوغو جنایتین جزاسینی اؤده‌ییردی. آخی ارک بیر میللتین ائوی و سیغیناجاق یئری ایدی و ائو ییخان آدامین، ائوی ییخالار البته.
فارس اقتداری ملکوتی کیمی آداملاری واختیندا آذربایجان و تورکه قارشی قوللانیب مصرف تاریخلری کئچندن سونرا ایشلنمیش دسمال کیمی بیر بوجاغا آتیر و تاسفله ملکوتی‌دن سونرا گلن جومه ایماملاری و باشقا تورک سیاست آداملاری دا، همن یولو گئدیب گئدیرلر. هله مسعود پزشکیان بو قدر ایلدن سونرا دئییر کی «بیز گرک واختیکن سونگوندن کرمانا داشینان میس و قیزیل حاقدا سوسمازدیق»، مرند- جولفا وکیلی معصومه پاشایی ده زنوز معدنلری‌نین تالانینا فرمان وئریر و باشقا تورک سیاستچیلری ده باشاردیقجا آذربایجان جمهوریتینه داش آتیرلار و گونوگوندن قوروماقدا اولان اورمو گؤلونون و داشینماقدا اولان میس و قیزیل معدنلریمیزین کئشیگینده دورمورلار.
