ادتاج اتحادیه دمکراتیک ترک آذربایجان جنوبی
گادتب: بو ایلین ده آذر آیینین ۲۱ – جی گۆنۆ گلیب کئچدی، سانال اوْرتامیندا همیشهکی کیمی، شکیل و پوْست پایلاشما بازاری چوْخ ایستیایدی،
آنجاق بو گۆنۆ عزیزلهینلرین ساییسینین چوْخ اوْلدوغونون گؤرمگی هرنهقدر سئویندیریجی اوْلسا دا، بیر شئیین قابارماسی چوْخ سینسیدیریجی گلدی.
اوْ دا یوْلبیرلرین طرفیندن؛ میللی حوکومتین ییخیلما گۆنۆنۆ آذرین ۲۱- جی گۆنۆ کیمی نظرده توتوماقلارایدی.
نئچه ایل بوندان قاباق بایرامیمیزی یاسا چئویرمک ایستهینلر یازیسیندا بو قونویا گئنیش حالدا توخانیلیب، آنجاق علی مرادی مراغهاینین از زندان رضاخان تا صدر فرقه دمکرات آذربایجان کیتابیندا گتیریلن سندلره باخدیغیمیزدا تبریز شهری، آذرین ۲۲ – جی گۆنۆ تئهرانین قدار عسگرلریایله، شرفسیز خانلارین ساتقین آداملارینین الینه دۆشۆب، جنایتلر باشلانیر.
ایندی ۲۱- جی گۆن شنلیکلر ، توْی – بایرام یئرینه نهدن یاس ساخلاییریق؟ فیرقهنین قورولوشوندان چوْخ ییخیلیشیلا باغلی یازیلار ، پوْستلار، شکیللر پایلاشیریق؟
سانیرام ائله بو ایش همن نجات آذربایجان آدلانان چیرکین دسیسهیه اویوب ، دۆشمان اوْجاغینا سو تؤکمک دئمکدیر.
آنجاق بو آرادا باشقا بیر قوْنو دا وار
۲۲- جی گۆن، یوردوموزون تاریخینده نه قدر قارا و آجی بیر گۆن اوْلسا دا، بو گۆنۆن ایچیندن شنلندیرن بیر گؤزل اوْلای دا تاپماق اوْلور؛
او دا آنا دیلیمیزین سارسیلمایان دیرهیی ، اسکی تاریخیمیزین یازانی، آتالار – آتاسی؛ آتا زهتابیمیزین آنادان دوْغولدوغو گۆندور.
و ائله همن بو گۆن پروفسور زهتابی آناسیندان دوْغولدوغو گۆنده، بیزلردن پای اومماق یئرینه، ان چوْخ یاییلیب سئویلن شئعرینی : ” سن اوْسان من ده بویام
سو دئییبدیر منه اولده آنام آب کی یوْخ” بیزلره پای وئرهرک، اوْنا اوْلان بوْرجوموزون آغیرلیغینی داها دا چوْخالتدی.
نئجه دئیرلر آذر، آذربایجان آییدیر
بو آیا باخدیغیمیزدا؛ یا بو یوردون تاریخینده قیزیل صفحهلر یازیلیب، یا دا ائله قیزیل صفحهلری یارادان نهنگ اینسانلارین دوْغوش یا دا دۆنیالارینی دییشدیکلری گۆنلری گؤرۆب،
زهتابیلریمیزه ، ساهیرلریمیزه، رشدیهلریمیزه، براهنیلریمیزه، پیشهوریایله ۲۵ مین دن آرتیق شهید دۆشن فداییمیزه ، بوْیون بوْرجوموز یا بایرام پایی اوْلاراق، قالدیردیقلاری اؤزگۆرلۆک بایراغیلا، آنادیلیمیزی، قیزیل قانلاریلا سوورایلان تاریخیمیزی قوْروماق دۆشر.
