Güney Azərbaycanda Qaraqışlaq kəndində əhali ekoloji fəlakətə görə duz zavodunun tikilməsinə etiraz ediblər

GADTB-nin Mətbuat Mərkəzinə daxil olan məlumata görə, Güney Azərbaycanın Salmas bölgəsinin Qaraqışlaq kəndinin sakinləri ekoloji fəlakətin qarşısını almaq məqsədilə kəndin ərazisində duz zavodunun tikintisinə etirazlarını bildiriblər.

Lakin irqçi fars molla rejimin Salmas və Urmiyadan göndərilən qüvvələri zorakılığa əl ataraq etirazçıları dağıtmağa çalışıblar. Baş verənləri videoya çəkən yerli sakinlərə qarşı isə sərt tədbirlər görülüb.

Aksiyaya səbəb müəssisənin yaradılmasından sonra kənd təsərrüfatı torpaqlarının əkin üçün yararsız hala düşmə ehtimalının yüksək olmasıdır.

Kənd sakinləri deyirlər ki, torpaqlarının Marağadakı “Kave Soda” zavodu kimi ölümcül maddələrin təsirinə məruz qalmasını istəmirlər. həmin zavodun ətrafındakı yüzlərlə hektar kənd təsərrüfatı sahəsi zərərli maddələrin buraxılması səbəbindən artıq məhsuldarlığını itirib.