ادتاج اتحادیه دمکراتیک ترک آذربایجان جنوبی
گادتب-نین مطبوعات مرکزینه داخیل اولان معلوماتا گؤره، آوسترالییا آذربایجان آسوسیاسییاسینین پرئزیدئنتی، گونئی آذربایجان دئموکراتیک تورک بیرلیگینین (گادتب) بئین الخالق علاقهلر دئپارتامئنتینین صدری سایین میکاییل بی اویتا آذربایجاندا ۲۰ یانوار فاجعهسینین ایلدؤنومو ایله باغلی بیلدیریش یاییب.
سایین میکاییل بیین یایدیغی بیلدیریشی تقدیم ائدیریک:
۱۹۹۰-جی ایل یانوارین ۲۰-ده روس اوردوسو باکییا ۲۶ مین عسگر گؤندردی و شیمالی آذربایجانین ایستیقلال حرکاتینی سوسدورماق اوچون چوخ جدی عملیات کئچیردی. سووئت اوردوسونون روس و ائرمنی عسگرلری تانکلاردان سلاحسیز خالقیمیزا آتش آچاراق دینج آذربایجانلیلاری قتله یئتیردی، یوزلرله اینسان یارالاندی، رئپرئسییایا معروض قالدی.
حادثهلر ائرمنیلرین سووئت حکومتینین دسته یی ایله یوز مینلرله آزربایجانلینی دده-بابا تورپاقلاری اولان غربی آذربایجاندان دیدرگین سالماسی ایله باشلامیشدی. سووئت ایمپئرییاسی ائرمنیستانین زوراکی دئپورتاسییا و ائتنیک تمیزلهمهلرینه گؤز یومدوغو حالدا، داغلیق قاراباغ اراضیسینی اله کئچیرمک جهدلرینه و ائکولوژی تئررورا اعتراض ائدن قوزئی آذربایجانین میللی-آزادلیق حرکاتینی یاتیرماغا چالیشیردی. روسییا حکومتی بو حرکاتی یاتیرماق اوچون گیزلی شکیلده فؤوق العاده وضعیت اعلان ائدرک، باکیداکی تئلئویزییا یاییمینین قارشیسینی آلماق اوچون آذربایجان تئلئویزییاسینین ائنئرژی بلوکونو پارتلاتمیشدی. داها سونرا هر هانسی بیر اعتراض جهدینی یاتیرماق اوچون بؤلگهیه علاوه سووئت قوشونلارینی یئرلشدیردیلر. یئریدیلهن قوشونا ایسه دینج اهالییه آتش آچماق امری وئریلدی. ۱۹۹۰-جی ایلدکی بو وحشیلیکلر گونوموزون ایشید و یا القاعده کیمی هر هانسی تئررور تشکیلاتلاری طرفیندن دئییل، تئررورچو روس اوردوسو طرفیندن تؤردیلیردی.
همین گئجه باکی کوچهلرینده دینج اعتراضچیلارا قارشی گؤرونمه میش قتل عام باش وئردی.
بو قتللر اصلینده گونئیلی قوزئیلی آذربایجانین ۵۵ میلیونلوق بوتؤو خالقینا قارشی تؤرهدیلهن قتل ایدی. دونیانین هر یئرینده یاشایان آذربایجانلیلار بو قتل عامین آغریسینی ایلیکلرینه قدر حیس ائدیردیلر.
بو حادثه میللتیمیزه دوستو و دوشمنی آییرد ائتمه یی اؤیرتدی. البته کی، بو حادثهلرین آرخا پلانی داغلیق قاراباغ ایدی. لاکین مسئلهلرین کؤکو یوز ایللر اوله ده گئدیب چیخیردی. ۱۹-جو عصره کیمی بوتؤو اولان آذربایجانین شیمالی، بو گون ایران آدلانان اراضیده حکمرانلیق ائدن تورک منشألی «ممالیکی محروسه قاجار»ین چار روسییاسی ایله آپاردیغی و مغلوب اولدوغو محاربهلرین سونوجوندا ایمضالادیغی تورکمنچای موقاویلهسی ایله روسلارین الینه کئچدی و مملکتیمیزه زلی کیمی یاپیشان روس موستملکهسی دؤورو باشلادی. ۲۰ یانوار همین موستملکهچیلرین تؤرتدیی نؤوبتی قتل عاملاردان بیری ایدی.
بو همین موستملکه ظلمو ایدی کی، هله ده آذربایجان میللتینین علیهینه اولان دوشمنچیلیک سیاستیندن ال چکمیردی. سون ایکی یوز ایلده خالقیمیزین باشینا گتیریلهن بلالار بونلارین نتیجهسی ایدی. آذربایجانیمیزین ایکییه بؤلونمهسی، آذربایجان دئموکراتیک رئسپوبلیکاسینین داغیدیلماسی، آذربایجان اراضیسینده ائرمنیستانین یارادیلماسی، جنوبی آذربایجاندا قورولان پیشه ورینین میللی حکومتینه آرخادان وورولان ضربهلر، ۱۹۳۷-۱۹۶۰-جی ایللر آراسیندا رئپرئسییالار، سیبیره سورگونلر، اؤلکهنین ۲۰ فایزینین ایشغال آلتیندا قالماسینا شرایط یاراداجاق ائرمنی هاوادارلیغی و نهایت شیمالی آذربایجانین موستقیللیک حایقیرتیلارینی قبول ائتمهیهرک خالقیمیزی تانکلارین آلتیندا ازمهلری موسکوا قاتیللرینین اینسانلاریمیزین صبر کاساسینی داشیران سون عمللری ایدی. یوزلرله قوربان وئرهن خالقیمیز آزادلیغینی قانلا الده ائتدی.
لاکین حاق نازیلر اما اوزولمز! بونون باریز نومونهسی ایللر سونرا موستقیل آذربایجانین آپاردیغی ۴۴ گونلوک میللی وطن محاربهسی اولدو. بو شرفلی محاربه خالقیمیزین بوتون دوشمنلرینه، همچینین تهرانداکی فارس رئژیمینه لاییقلی بیر گؤندرمه ایدی.
بیز آوسترالییا آذربایجان آسوسیاسییاسی اولاراق بوتؤو آذربایجانیمیزین میللی ماراقلاری نقطه نظریندن چیخیش ائدیریک. ۵۵ میلیونلوق آذربایجان خالقی ایله همرأی اولاراق بیلدیریریک کی، اولکی دؤورلردن فرقلی اولاراق بو ایل قارا یانوارین ایلدؤنومونده شهیدلریمیزین روحونو یاد ائتمکله یاناشی، بو گونو میللتیمیزین دوشمهنلرینه قارشی اعتراض گونونه چئویرملیگیک. حؤرمتلی عالی باش کوماندان، ایلهام علیئوین دئدیگی کیمی، هامیمیز بیر یومروق کیمی اولمالیییق. گونئی آذربایجاندا سسله نن «روس، فارس، ائرمنی آذربایجان دوشمنی» شوعاری بوتون آذربایجان اوچون کئچرلیدیر. تاریخینی بیلمهیهن و اونودان میللت همیشه محبسده اولار. تاریخمیزی اونوتمامالیییق.
میللتیمیزین آزادلیغی و تورپاغیمیزین ایشغالدان آزاد ائدیلمهسی اوغروندا جانلارینی فدا ائدن بوتون شهیدلریمیزین روحو شاد اولسون!
یاشاسین آذربایجان، یاشاسین مظفر اوردوموز!
عشق اولسون ۵۵ میلیونلوق قوزئیلی و گونئیلی آذربایجانلیلارا!
میکاییل اویتا
آوسترالییا آذربایجان آسوسیاسییاسی پرئزیدئنتی
