ABŞ İran və “Hizbullah”la əlaqəli şəxslər və şirkətlərə qarşı yeni sanksiyalar elan edib

GADTB: ABŞ Maliyyə Nazirliyi çərşənbə gecəsi İran və Livanın “Hizbullah” terror təşkilatı ilə əlaqəli olduğu bildirilən bir sıra şəxs, şirkət və neft tankerlərinə qarşı yeni sanksiyalar tətbiq etdiyini açıqlayıb.

Məlumata görə, sanksiyalar əsasən Məhəmməd Hüseyn Şəmxani — Əli Şəmxaninin oğlu — ilə əlaqəli iqtisadi şəbəkəni hədəf alır. ABŞ tərəfi onun İran və Rusiya neftinin satışı ilə bağlı milyardlarla dollar dəyərində şəbəkəni idarə etdiyini iddia edir.

ABŞ Maliyyə naziri Skott Bessent bildirib ki, Vaşinqton İran rəhbərliyinə bağlı nüfuzlu şəxsləri və onların ailələrini hədəfə almaqda qərarlıdır. Onun sözlərinə görə, bu şəxslər İran xalqının hesabına böyük sərvətlər toplayırlar.

Nazirlik qeyd edib ki, Donald Tramp administrasiyası dövründə İranın qeyri-qanuni yanacaq ixracından əldə etdiyi gəlirlərin qarşısını almaq məqsədilə tədbirlər davam etdiriləcək. Həmçinin vurğulanıb ki, ABŞ lazım gəldikdə terror fəaliyyətlərini dəstəkləyənlərə qarşı “ikinci dərəcəli sanksiyalar” da tətbiq edəcək.

Yeni sanksiyalar çərçivəsində “Aura” adlı mayeləşdirilmiş qaz daşıyan gəmi və müxtəlif bayraqlar altında fəaliyyət göstərən daha səkkiz neft tankeri qara siyahıya salınıb. Bundan əlavə, BƏƏ-də yerləşən 10 dəniz xidmətləri şirkəti, Marşal adalarında qeydiyyatdan keçmiş 4 gəmiçilik şirkəti və bir Hindistan şirkəti də sanksiyalara məruz qalıb.

Sanksiya siyahısına həmçinin İran vətəndaşı Seyid Bədrəddin Nəimayi Musəvi də daxil edilib. ABŞ Maliyyə Nazirliyinin məlumatına görə, o, İslam İnqilabı Keşikçiləri Korpusu – Qüds Qüvvələri ilə əlaqəli olub və “Hizbullah” üçün maliyyə təminatında rol oynayıb.

Bildirilir ki, Musəvi eyni zamanda Nikolás Maduro ilə əlaqələrə malik olub və İran neftinin qızıl müqabilində Venesuelaya ötürülməsi əməliyyatlarında iştirak edib.

ABŞ Maliyyə Nazirliyi qeyd edir ki, bu addım daha əvvəl tətbiq olunmuş sanksiyaların davamı olmaqla, İrana qarşı “maksimum təzyiq” siyasətinin bir hissəsidir.