GADTB Güney Azərbaycan Demokratik Türk Birliyi
GADTB: ABŞ Maliyyə Nazirliyinin Xarici Aktivlərə Nəzarət İdarəsi (OFAC) sentyabrın 8-i, çərşənbə axşamı, İrana dair sanksiyalar siyahısını yeniləyərək bir sıra İran aviaşirkətlərini və aviasiya sektoru ilə əlaqəli şirkətləri sanksiya tətbiq olunan fiziki və hüquqi şəxslər siyahısına əlavə edib.
ABŞ Maliyyə Nazirliyinin açıqlamasına əsasən, Ata, Çabahar, Iran Air Tour, Aseman, Kish Air, Karun, Qeshm Air, Sepehran, Taban, Zagros, Varesh, Fly Persia və digər bir sıra İran aviaşirkətləri sanksiyalar siyahısına daxil edilib.
Xarici Aktivlərə Nəzarət İdarəsi, həmçinin Birləşmiş Ərəb Əmirlikləri, Böyük Britaniya, Türkiyə, Malayziya və Qazaxıstanda yerləşən və Mahan Air və ya onunla əlaqəli şəbəkələrlə əlaqəsi olan bir neçə şirkətə qarşı da sanksiya tətbiq edib.
ABŞ Maliyyə Nazirliyi sentyabrın 8-dən etibarən İrana bəzi mülki təyyarələrin müvəqqəti olaraq təkrar ixracına və bununla bağlı əməliyyatların həyata keçirilməsinə icazə verən General License J-1 (İran) lisenziyasını da dayandırıb.
Eyni zamanda, nazirlik mülki aviasiya ilə bağlı bəzi əməliyyatların başa çatdırılmasına, habelə sentyabrın 8-də sanksiyaya məruz qalan şəxslərlə əlaqəli müəyyən əməliyyatların həyata keçirilməsinə imkan verən yeni ümumi lisenziyalar yayımlayıb.
