ABŞ və İsrail İrana qarşı hücumların yenidən başlanmasına hazırlaşır

GADTB: Amerikanın “Nyu-York Tayms” qəzeti 25 ordibeheşt cümə günü Yaxın Şərqdən olan iki yüksəkvəzifəli mənbəyə istinadən yazıb ki, ABŞ və İsrail İrana qarşı hücumların yenidən başlanması ehtimalı üçün geniş hazırlıq işləri aparır və bu hücumlar hətta gələn həftənin əvvəlindən başlaya bilər.

Adlarının açıqlanmasını istəməyən mənbələrin bildirdiyinə görə, bu hazırlıqlar 19 ferverdin tarixində qüvvəyə minmiş atəşkəsdən bəri ən genişmiqyaslı hərbi hazırlıq hesab olunur.

ABŞ Prezidenti Donald Tramp 22 ordibeheşt tarixində Çinə səfərə yola düşməzdən əvvəl demişdi: “Ya razılığa gələcəklər, ya da tamamilə məhv ediləcəklər. Hər iki halda qalib bizik”.

Amerikalı rəsmilərin sözlərinə görə, əgər Tramp hərbi hücumların yenidən başlanması barədə qərar versə, variantlar arasında İranın hərbi obyektləri və infrastrukturuna zərbələr də yer alır.

Onlar əlavə ediblər ki, digər seçim yerin dərin qatlarında yerləşən nüvə materiallarını hədəfə almaq üçün xüsusi əməliyyat qüvvələrinin İran ərazisinə yerləşdirilməsini nəzərdə tutur.

Mənbələrin bildirdiyinə görə, belə bir variantı Trampın ixtiyarına vermək üçün mart ayında yüzlərlə xüsusi əməliyyat qüvvəsi Yaxın Şərqə göndərilib.

“Nyu-York Tayms” yazır ki, Donald Tramp cümə günü Çindən qayıdarkən İranla bağlı mühüm qərarlarla üz-üzə qalıb. Çünki onun yüksəkvəzifəli köməkçiləri, prezident danışıqlardakı çıxılmaz vəziyyəti yeni bombardmanlarla aradan qaldırmaq qərarı verərsə, hərbi əməliyyatların yenidən başlanması üçün planlar hazırlayıblar.

Həmin köməkçilərin sözlərinə görə, Tramp hələ növbəti addımı ilə bağlı yekun qərar verməyib.

Maraqlı tərəflərin rəsmiləri İranı Hörmüz boğazını yenidən açmağa vadar edəcək və Trampa qələbə elan etməyə imkan yaradacaq kompromis formulu üzərində çalışırlar. Məqsəd həm də ABŞ seçicilərini inandırmaqdır ki, İrandakı bu bahalı və ölümcül hərbi müdaxilə uğurlu olub.

İran rəsmiləri də qarşıdurmaların yenidən başlanmasına hazır olduqlarını bildiriblər.

İran parlamentinin sədri Məhəmmədbaqir Qalibaf bazar ertəsi sosial şəbəkədə yazıb: “Silahlı qüvvələrimiz hər hansı təcavüzə dərs verəcək cavab verməyə hazırdır. Yanlış strategiya və yanlış qərarlar həmişə yanlış nəticələr doğurur və artıq bütün dünya bunu anlayıb”.