Ayaz Seyfxahın həbsxanada eşitmə vəziyyəti ağırlaşıb, müalicə üçün xəstəxanaya göndərilmir

GADTB: Azərbaycan Milli Hərəkatının fəalı və siyasi məhbus, Evin həbsxanasında saxlanılan Ayaz Seyfxahın 12 günlük müharibə zamanı sol qulağından ciddi xəsarət alıb. Məlumatlara görə, hazırda onun sol qulağı ilə eşitməsi tamamilə dayanıb.

Bildirilir ki, Ayaz Seyfxahının sol qulaq pərdəsi Evin həbsxanasına raket hücumu zamanı zədələnib. Həbsxana həkimləri müayinə etdikdən sonra onun həbsxanadan kənarda yerləşən xəstəxanada müalicəyə ehtiyacı olduğunu bildirərək xəstəxanaya göndərilməsi üçün müraciət ediblər. Lakin həbsxana rəhbərliyi büdcə çatışmazlığını əsas gətirərək onun xəstəxanaya aparılmasına mane olur.

Ayaz Seyfxahın 2024-cü ilin fevralında ədalətli məhkəmə araşdırmasının əsas prinsiplərinə əməl edilmədən həbs edilib. O, 2024-cü ilin oktyabrında Tehranın İnqilab Məhkəməsinin 15-ci şöbəsi tərəfindən, hakim Əbülqasım Səlavati sədrliyi ilə, 14 il müddətinə azadlıqdan məhrumetmə cəzasına məhkum edilib. Sözügedən hökm apellyasiya məhkəməsində də təsdiqlənib.