Şənbə , Noyabr 27 2021
azfa

Azərbaycanda kənd təsərrüfatı üçün yeni PUA hazırlandı

GADTB-nin Mətbuat Mərkəzinə daxil olan məlumata görə,  “Elm və Texnologiya Parkı” MMC kənd təsərrüfatında tətbiq olunan pilotsuz uçuş aparatı istehsal edib.

Bu barədə AMEA-dan məlumat yayıb.

Pilotsuz uçuş aparatı (PUA) (NF-10) ilə Neftçala rayonunda fərdi fermer Rahim İmanova məxsus pambıq sahəsində uçuş keçirilib.

Görüşün əsas məqsədi müəssisənin istehsal etdiyi dronun, həmçinin multispektral kamera vasitəsilə çəkilişlərin və PUA-nın pambıqçılıqda tətbiqi imkanlarını nümayiş etdirməkdir.

Uçuş missiyası 20 hektar sahədə, 37 dəqiqə davam edib. PUA-ya birləşdirilən multispektral kamera (MicaSense RedEdge-M) vasitəsilə şəkillər əldə olunub. Fotoşəkillər “Agisoft Photoscan” proqram vasitəsilə emal edilib və sahə üzrə vegetasiya indeksi müəyyənləşdirilib.

Hazırda kənd təsərrüfatında geniş tətbiq edilən müasir və dəqiq texnologiyalardan biri NVİF (Normallaşdırılmış Vegetativ İndeks Fərqi) – NDVI (Normalized Difference Vegetation Index) analizidir.

Bu texnologiya kənd təsərrüfatı sahələrinin xüsusiyyətlərini, aqrokimyəvi tərkibini təhlil etmək imkanları yaradır. Bu xidmət əkin sahələrinin səmərəliliyinin artırılması, maya dəyərinin azaldılması, ətraf mühitin qorunması və məhsuldarlığın artırılmasına yönəlmiş müasir texnologiyadır. Kənd təsərrüfatı sahəsində multispektral analizin məqsədi fermerlərə əkin sahəsində görə bilmədiklərini müşahidə etmək, bitkilərin səmərəliliyini və sağlamlığını təyin etmək imkanının təqdim olunmasıdır. Müntəzəm olaraq NVİF analizi sayəsində kənd təsərrüfatı sahələrində dəyişikliklər dinamikasını izləmək, həmçinin torpaq sahələrinin məhsuldarlığı və münbitliyini müəyyən etmək mümkündür. NVİF həm də bitki örtüyünün sıxlığını xarakterizə edir ki, bu da bitkişünaslara (aqranom) bitkilərin cücərmə və böyümə vəziyyətini, torpaq sahəsinin məhsuldarlığını qiymətləndirməyə imkan yaradır.

Mütəxəssislər NVİF vasitəsilə bitki örtüyünün bütün torpaq sahəsində, həm də onun ayrı-ayrı hissələrində kəmiyyət cəhətdən qiymətləndirilməsi, məhsuldarlığın hesablanması, bitkilərin cücərməsinin və böyüməsinin müşahidəsi, eləcə də torpaq sahələrinin məhsuldarlığının təhlil olunması imkanı əldə edirlər.

Həmçinin yoxlayın

Soçi görüşünün nəticələri ilə bağlı bəyanat yayılıb

GADTB-nin Mətbuat Mərkəzinə daxil olan məlumata görə, noyabrın 26-da Soçidə Azərbaycan Respublikasının Prezidenti İlham Əliyev, …

İran qüvvələri İsfahanda etirazlara atəş açdı-Video

GADTB-nin Mətbuat Mərkəzinə daxil olan məlumata görə, bir neçə gündür davam edən etirazlar İsfahan Xürrəmabadda …