Azərbaycanlı öyrənci fəalı Melika Qaragözlü vəsiqə qarşılığında zaminə buraxılıb

GADTB-nin Mətbuat Mərkəzinə daxil olan məlumata görə, azərbaycanlı öyrənci fəalı Melika Qaragözlü vəsiqə qarşılığında zaminə buraxılıb.

“Əllamə Təbatəbayi” Universitetinin jurnalistika fakültəsinin öyrəncisi, azərbaycanlı fəal Melika Qaragözlü avqustun 24-də 1 milyard 600 milyon tümənlik girov qarşılığında məhkəməyə qədər zaminə buraxılıb.

Bir neçə gün bundan öncə Melika Qaragözlünün vəkili Məhəmmədəli Kamfiruzi müvəkkilinin həbsinin qanunsuz olduğunu deyib. O, bunu insan haqları prinsiplərinin kobudca pozulması adlandırıb.

Qeyd edək ki, Melika Qaragözlü iyulun 13-də məcburi hicaba etiraz olaraq yaylığını başından açıb yerə atdığı videonu paylaşdıqdan sonra İran rejiminin məmurları tərəfindən həbs edilmişdi

Bundan öncə isə Melika Qaragözlü 2019-cu ilin noyabrın 18-də Tehranda benzinin qiymətinin kəskin bahalaşmasına qarşı keçirilən kütləvi etirazlar zamanı tutulub 6 ay həbsə məhkum edilsə də, dekabrın 1-də  600 milyon riallıq vəsiqə girovu qarşılığında müvəqqəti olaraq sərbəst buraxılmışdı.