GADTB Güney Azərbaycan Demokratik Türk Birliyi
GADTB: Noyabrın 9-də ardıcıl ikinci gün Azərbaycanlı milli fəallar Tahir Nəqəvi və Vüdud Əsədinin ailə üzvləri və yaxınları Tehrandakı Evin həbsxanasının əsas qapısı qarşısında etiraz aksiyası və oturaq aksiya keçiriblər.
Mənbələrin verdiyi məlumata görə, etiraz zamanı təhlükəsizlik qüvvələri aksiyanın davam etməsinin qarşısını almağa çalışıblar. Bu zaman Tahir Nəqəvinin həyat yoldaşı Səhilə Sədiqiani müvəqqəti olaraq saxlanılaraq sorğu-sual üçün həbsxana binasına aparılıb. O, təxminən bir saat sonra azad edilib.
Aksiya iştirakçıları məsul şəxslərdən iki azərbaycanlı siyasi məhbusun vəziyyəti barədə şəffaf məlumat verilməsini və onların durumuna dair rəsmi açıqlama tələb ediblər. Ailələr bildiriblər ki, rəsmi və aydın cavab almayınca etiraz aksiyalarını davam etdirəcəklər.
Qeyd edək ki, hazırda Tahir Nəqəvi və Vüdud Əsədi həbsdə insan haqlarının pozulmasına və həbsxana rəhbərliyinin biganəliyinə etiraz olaraq aclıq aksiyasını davam etdirirlər. Məlumata görə, onların səhhəti narahatedici vəziyyətdədir.
İran İslam Respublikasının Konstitusiyasının 27 və 34-cü maddələrinə, həmçinin İranın tərəfdar çıxdığı Beynəlxalq Mülki və Siyasi Hüquqlar Paktının 21-ci maddəsinə əsasən, vətəndaşların dinc yolla etiraz etmək və ədalət tələb etmək hüququ tanınır.
Bununla belə, siyasi məhbusun həyat yoldaşının həbsxana qarşısında dinc iştirakına görə saxlanılması, həm ölkə qanunlarının, həm də beynəlxalq öhdəliklərin açıq şəkildə pozulması və siyasi məhbus ailələrini qorxutmaq siyasətinin bir nümunəsi kimi qiymətləndirilir.
Nəqəvi və Əsədi ailələri bildiriblər ki, yaxınlarının vəziyyəti və taleyi barədə aydın məlumat alana qədər etirazlarını davam etdirəcəklər.
