ادتاج اتحادیه دمکراتیک ترک آذربایجان جنوبی
گادتب: 8 مارس دونیا قادین گونو آدینا یازماق، تکجه تقویمین بیر گونون‌دن یازماق دئییل، تکجه او گونده اولان اولای‌لاردان یازماق دئییل ، تکجه قادین‌دان یازماق دئییل . .
ایندی دونیا قادین گونو آدینا یازماق، خیاوان‌دان یازماق‌دیر، قادین حاق‌لاریندان یازماق‌دیر ، شهردن یازماق دیر.
یانی یازا بیلمه‌مک دیر اصلینده.
یازماق ایسته‌ین زامان قلمی یئره آتیب خیاوانا چیخماغا هوسلنمک‌دیر.
اما هانسی خیاوان ؟؟
“خیاوان‌لاری قادین‌لارین الللرینن آلیب‌لار ، اللرینی ائوده ساخلامیشدیرلار ، آیا‌ق‌لاری‌نین ایزی شهردن سیلینیپ بو توپلومدا اصلیندا ال‌سیز ، آیاق‌سیز ، دیل‌سیز ، آغیزسیز اولموش‌لار !
کور قوش اولموش کیمی !
کور قوش اولماق ندیر سوروشسان ، دئیه بیلمه‌یه‌جه‌یم ، دینمه‌دییمدن بیلرسن البت کور قوشون نئجه اولدوغونو !
اللرینی یوموب گوج‌لرینی بیله‌‌ک‌لرینی ییغیب ، خیاوانا آددیم قویوب بیر حادثه ایله اوزاوزه گلمک هووشنه‌سینه حسرت قالمیش‌لار ، هؤوشنه دئدییمیده قورخونو لذت‌له دویماق حسی دیر منظوروم.
خیاوان‌لاردا تکجه ائوه گئدیب چاتماق اوچون آددیملامیشدیلار بیر عؤمور ، خیاوانسیزلامیشدیلار یاواش یاواش ، شهر اؤگئی آنا اولموشدو ، اؤگئی آتا !
آتیلمیش اوشاق‌لار کیمی آوارا قالمیشدیلار ، یانی قالمامیشدیلار هئچ !
شهر پنجره آرخاسیندان ال چاتیلماز تصویر ایدی ، شوشه دالیسیندا ، ال دییلمه‌ین ویترین ایدی . .
سوروشورسان ندن فعل‌لری کئچمیشده قالیب ؟؟؟
ندن ایندی‌دن دئییب آنجاق فعل‌لرینی کئچمیشده ساخلاییرلار ؟
دوزونو دئیه بیلمه‌یه‌جه‌یم ، اما دوزونو آختارسان من‌ده بیلیرم بو فعل‌لر کئچمیشدن ائله ایندی‌نین اولونموشلارینین فعل‌لریدیرلر ، لاپ دوغروسو گله‌جکه ده سورونن فعل‌لردیرلر !
اما قوی کئچمیشده قالسین بو منفعل فعل‌لر.
اَل آتیب پنجره‌نی آچ ، خیاوانا چیخماق هوسینی چیغیر شهره اوزونوزه دئیب تکرارلاین !
قوی قورخونوز تؤکولسون شهره دئیه اَل آیاق آچین ، چیغیرباغیر سالین . .
آمما ندن یئنه قَلمی یئره آتیب چیخا بیلمه‌دیلر خیاوانا سانکی بیر قورخودا قورخولارینا ایضافه‌له شیب !
