ادتاج اتحادیه دمکراتیک ترک آذربایجان جنوبی
گادتب: بوگون شبسترلی معجزون دوغوم گونودور و بیزجه معجز حاققیندا نه‌قدر یازیلسا یئنه آزدیر. آما بیز بو قیسا فرصتده اونون نثر هنرینی اوخوجولارا تانیتماق ایسته‌ییریک. معجزون نثری ده شعری قدر گؤزل و آهنگلی ایدی کی بیز بوردا، اونون «آخیر چرشنبه دوعاسی» عنوانلی اوزون نثری‌نین نئچه پاراگرافینی پایلاشیب، بوتون اوخوجولاردان عاجیزانه طلب ائدیریک کی او شاعیرین روحونو بیر آلقیشلا شاد ائتسینلر.
آخیر چرشنبه دوعاسی
ایلاهی سنی آند وئرریک صدری‌نین صداقتینه، کره یاغی‌نین کرامتینه، جمیع علی شیعه‌سینی آخیر چرشنبه گئجه‌سی حالوانین قبرینه زوّار ائله!
ایلاهی سنی آند وئرریک پیلووون زولفِ پریشانینه، بیزیم الیمیزی خوروشون دامنیندن کم و کوتاه ائله‌مه!
خدایا، خداوندا سنی آند وئرریک پوسته‌نین دهانِ تنگینه، خورمانین خوش رنگینه، بیز اهلِ شبستری موبارک یئددی لَوین‌ین شفاعتیندن محروم و بی‌نصیب ائله‌مه!
خدایا، خداوندا سنی آند وئرریک کوچه‌لریمیزین زیغینا، حاماملاریمیزین کثافتلیغینه، جوانلاریمیزین قویدوغو بیغینا، سن بو یالانچی موسلمانلارین ایمانینی کامیل ائله!
ایلاهی سنی آند وئرریک دؤولتلی‌لریمیزین توخلوغونا، فُقَرالریمیزین چوخلوغونا، خئییروو سویونون یوخلوغونا، یا بیزی اؤلدور طلبکارین یاخاسینی قورتار، یا طلبکاری اؤلدور بیزیم یاخامیزی خیلاص ائله!
آی آرپا چؤره‌یینی بیر بیرینین الیندن قاپانلار، آی سویوق یارما آشینا حسرت قالانلار، آمین دئیین!
ایلاهی سنی آند وئرریک گیرده‌کانین گیرده‌لوغونا، فیندیغین خیردالیغینا، سیس‌بَیین قبریستانلیغینا زیبیل تؤکنلرین باشین قویوب، آیاغینا یامان داش وورما!
ای اییده یئییب چرده‌یین حصیر آلتینا سوخانلار، ای بورنونو اتگی ایله سیلَن‌لر، ای پیسپیسلی کیمی دونبالانلار، مبادا آللاهین بئیتینده سیزدن بیر حادیثه بروز وئره، هر ایکی دونیادا روسیاه اولاسیز، قالخین اوجادان آمین دئیین!
به به، طاغدان دا بیر نذیر وئردیلر. ای باجی بیلمیرم موسلمانسان یا کافیرسن، بوینووا قیزیل تاخیرسان، نامحرم‌لره باخیرسان، ایلاهی آند وئرریک اوجی بینیغین قدّینه، وَلاالضّالین‌ین مدّینه، بو عورتین جدّینه جنّات عدنده یئر کرامت ائله! اوجادان آمین دئین‌لرنَن برابر!
ایلاهی سنی آند وئرریک رِبانین مباحلیغینا، قوماربازلارین ساغلیغینا، فرعونون آللاه‌لیغینا، کلبه حسین‌قولونون جرّاحلیغینا، بو نذیر صاحبینی عصرین عزرائیل حکیملرینه و ایداره‌لرینه مؤحتاج ائله‌مه! آمین دئین سنی گؤروم وایقانلی زولفعلی‌نین سودونه راست گله‌سن!
به به، اوستا عباسعلی ده بیزه بیر نذیر گؤندردی. خدایا سنی آند وئرریک مشه لوطفعلی‌نین اشتهاسی‌نین آزلیغینا، هئروو جعفرین کئفی‌نین سازلیغینا، کربلایی حسنعلی‌نین گؤزلوغونه، آغا میرزه علیمحمد آغانین سخنورلیغینه، بیره یوزمین بو دونیادا، بیره مین آخرتده اجر و عوض کرامت ائله! ای باشینی اوستا عباسعلی‌یه قیرخدیریب پول وئرمه‌ین‌لر، اوجادان آمین دئیین!
ایلاهی بو عمی کی آدین بیلمیرم، منه پول التفات ائله‌دی، ای عمی، آللاه قادانی بلانی، عقرب ایلانی، ماممیلی ماتانی، یانیندا یاتانی، رحمتلیک آتانی، یئرین گؤیون بلیّاتیندان محفوظ ائله‌سین!
