گادتب: آزربایجان تورک میلتی تاریخده هئچ واخت ایشغال، سؤمورگه و اسارتده یاشاماغا بویون اَگمهییبدیر.آزربایجان تورک میلتی تاریخده هر زامان آزاد و باغیمسیز یاشاییبدیر؛ آزادلیغینی ایتیردیگی زامان ایسه موطلق آزادلیغینا قوووشماق اوچون آمانسیز موباریزه آپاریبدیر.
آزربایجان تورک میلتی نین ایشغال و سؤمورگهیه قارشی موجادیله وئرمهسینین بلکه ده ان بؤیوک سیمگه و سیماسی بابکدیر. بؤیوک سرکرده بابک آزربایجانین ییخیلمازلیق، یئنیلمزلیک و وطن اوچون اؤلومونه موباریزهنین ان بؤیوک آبیدهسیدیر. اولو بابک ییرمی اوچ ایل آردیجیل قهرمانلیق و سارسیلماز ایراده ایله وطنیمیز آزربایجانین باغیمسیزلیغی اوغروندا ایشغالچیلارا قارشی دؤیوشوب، میلتیمیزین یاد تاپداغی آلتینا دوشمهمهسی اوچون ساواشیب و هر شئیدن قییمتلی اولان جانینی دا بو یولدا قوربان وئرمیشدیر.
محض اونا گؤره ده بو گون بئله اولو بابک گونئی آزربایجاندا میللی اؤزگورلوک موجادیلهسینین بیر رمزی و تیمثالی حالینا گلمیشدیر. اونون بو داورانیشی اؤزوندن سونراکی قوشاقلار اوچون خوصوصییله بیزیم بوگونکو گنج نسلیمیز اوچون بیر اؤرنک و یول گؤستریجیدیر. میلتیمیز ایشغال و سؤمورگهیه قارشی موباریزهسینده بابک آدینی و سیماسینی اؤزونه سیمگه و بایراق ائتمیشدیر. ایللر اؤنجه بابک قالاسینا توپلانیب میللی قورولتای قوران یوز مینلرله آزربایجان تورکو بابک آدییلا فاشیزم، شوونیزم، عیرقچیلیک،ایستیبداد،سؤمورگه و ایشغاالا قارشی عوصیان سسینی قالدیرمیشدیر.
بابک قالاسی قورولتایلاری گونئی آزربایجاندا میللی موجادیلهنین بیر دؤنوم نؤقطهسی اولموشدور. بابک قالاسی قورولتایلاری ایله میللی موجادیلهمیز کوتله وی لشمیش و توپلومون ان درین لایهلرینه ائنمیشدیر. عیرقچی و گئریچی ایران دؤولتی میلتیمیزین عوصیان سسیندن قورخویا دوشوب بابک قالاسی قورولتایلارینی عسگری گوجله باسدیرسا دا آرتیق اوخ یایدان چیخمیش و میلتیمیزین تاریخینه آلتین بیر صحیفه داها یازمیشدیر. بابک قالاسی قورولتایلاری بیر میللی ظفر کیمی آزربایجان تورک میلتی نین تاریخینده ثبت اولموشدور.
بابک قالاسی قورولتایلاری یاساقلانسا دا، بو قورولتایلارلا کوتله وی لشن آزربایجان میللی حرکتی شهر مرکزلریمیزه داشینمیش
داها گوجلو و داها یایغین بیر موجادیله یه چئوریلمیشدیر.
شوبههسیز کی اولو بابک و بابک قالاسی قورولتایلارینین روحو گونئی آزربایجاندا یاشاییر و بوگونکو موباریزه ایرادهمیزی بسلهییر. بو موجادیله روحونون گونئی آزربایجانین قورتولوشو و اؤزگورلوگونون تام آنلامی ایله الده ائدیلمهسینه قدر چاغلایان بیر وولکان کیمی قایناییب داشاجاغینا کیمسه نین شوبهه سی اولمامالیدیر.
بو وسیله ایله
اولو بابکین دوغوم گونو و بابک قالاسی قورولتایلارینین ایل دؤنومونو آزربایجان
تورک میلتینه تبریک دئییب تام قورتولوش و اؤزگورلوگوموزو الده ائدنه قدر موباریزهمیزی
داوام ائدهجگیمیزه آندیمیزی یئنیلهییریک.
گونئی آزربایجان استقلالچیلار بیرلیگی آزربایجان سیاسی قورولوشلاری نین
امکداشلیق پلاتفورمو
– گآدتب
– آزوح
– گآیپ
– دیرنیش
– میلی یول – گآدپ
-ومآج
29/06/2019