ادتاج اتحادیه دمکراتیک ترک آذربایجان جنوبی
گرکن بوتون زامانلار کیمی او گون ده تبریز آیاغا قالخدی.
فاشیست شاهلیق سولاله‌سی یئرا وزوندن سیلینمه‌لی ایدی! بو حؤکم تبریزدن گلمیشدیر!
تبریز، پانفاشیست فارسچی رئژیمین اؤلوم حؤکمونو وئرینجه، بیر داها بو تورپاقلاردا شووینیزم یاشاماسین دئیه اومیدوار اولموشدور. لاکین، دونیا گوجلرینین ایمپئریالیست احتراسلاری دئموکراتییا دئییل، دئسپوتیزمی حدفه آلمیشدیر.
-1356جی ایل بهمه‌نین 29-دا (1978-جی ایل فئورالین 18-ده) شاه-خومئینی راضیلاشماسییلا دینی تورک طلبه‌لرینین قوم شهرینده قورشونا باغلانماسینین 40-جی گونونده یوزمینلرجه آزربایجان تورک میلتی وطنین دؤرد بیر یانیندان تبریزه آخین ائده‌رک قتله یئتیریلمیش اؤولادلارینین یاسینا قالخدیلار. پانفاشیست فارسچی رئژیمین تبریزدن اولان هاقلی قورخوسو گوندمه گلدی. تبریزین بؤیوک بازاریندا یئرلشن قیزیللی مسجیدیندن باشلایان میلت آیاقلانماسی بیر آن ایچینده بوتون تبریزی بورودو. رئژیمین پولیسی، ساواکی و اوردوسو بیر آن ایچینده محو اولدو. رئژیمه عایید اولان بوتون مرکزلر میلتین الینه کئچدی. رئژیم، سرسمجه‌سینه ایران آدلانان دؤولتین بوتون باسقی اورقانلارینی اوچاقلارلا تبریزه گتیردی. آنجاق، ایش-ایشدن کئچمیشدیر. تبریز اؤز حؤکمونو وئرمیشدیر!
8 ساعات سورن “29 بهمن عوصیانی” پانفاشیزمین اؤلوم حؤکمونو ایمضالامیش اولدو. 10-لارجا گنجمیز شهید دوشدو. 11-رینین آدی-سانی بللی اولاراق، بیر چوخ تورک توتوقلاناراق آنیندا قورشونا وئریلدی. فاشیست پهلوی سولاله‌سینین خالقلار قارشیسینداکی دیرنجی بیر ایلدن آرتیق سورمه‌دی. تورک دوشمه‌نی اولان رئژیم، تورک شیلله‌سیله یئرله بیر اولدو!
شاهلیق اؤلونجه، ایمپئریالیزمین اتگی آلتیندان یئنی بیر فاشیست رئژیم اورتایا چیخدی. خومئینیچی فوندامئنتال شیعه-فارس رئژیمی خالقلارین آلدادیلمیش ذهنیتی اوزرینه مینه‌رک داها فاشیست، داها شووینیست و داها قانلیجا ایش باشینا گلدی. خومئینی رئژیمی، ایلک فورصتده تورک دوشمنی اولدوغونو، بو یؤنده شاهدان داها قان ایچن اولدوغونو گؤسترمک اوچون اؤزونون اوستو اولان تورک دینی لیدئری [آیتوللاه شرعیتمداری] اؤلدوره‌رک گؤوده گؤستردی.
شاه رئژیمینین سورجینده وئردیگی قانلارین یوز قاتینی بو رئژیمین 40-ایللیک دؤزومسوز و آجیماسیز چاغیندا وئرمیش اولان تورک میلتی، هله ده 1925-جی ایلدن بری یاساقلانمیش میللی حاقلارین باسقیسیندا سورونمکده‌دیر. آرتیق، آزربایجان تورک میلتی اوچون بوتون باریش یوللاری قاپانمیشدیر. آرتیق تورک-فارس وارلیقلارینین ایران آدلانان دؤولت چاتیسیندا بیرگه یاشاماسی مومکونسوز اولموشدور.
گونئی آزربایجان دئموکراتیک تورک بیرلیگی (گادتب)، دونیانین ان سونا قالمیش گئری قافالی راسیزمینه قارشی قلبه‌نین تکجه یولونون ایستیقلال اولدوغونو وورغولاییر. گادتب، میللی قورتولوش یولوندا بوتون میللی قوروملارین شفاف، جسارتلی و تک سؤزلو اولدوغونو اومید ائدیر. گونئیین، ایستیقلالدان باشقا یولو یوخدور. بونو بوتون میللی قوروملاریمیزین آنلاماسی گره‌کی ر. گونئی آزربایجان تورکلرینین اؤزگورلوک ساواشینین آدرئسی آنجاق و آنجاق گونئی آزربایجاندیر. تورک داواسی دئدیگینده آیری-سئچگیلیک اولاماز! تورک، بیر دؤولته اؤزل دئییل، بیر حاکیمیتینین مئیلی ایله تورک داواسی دایانارسا و یا ایرانچیلیغا چکیلرسه، او تورک داواسی دئییل، گوج و جیب داواسیدیر. تورک داواسی جسارت، تک اورک، تورک اولکوسونون دیندن آرینماسینی ایستر. 95-ایلدیر کی، بوتون میللی وارلیغیمیز “ایران” عیرقچی پانفاشیست فارسچی رئژیملر طرفیندن ایشقال آلتیندادیر. آرتیق سویون اوفلنمه‌سینه گرک قالمامیشدیر! ایستیقلال گونئیین تکجه ایلاجیدیر!
سن ده گل قارداشیم-باجیم! گونئی آزربایجان ایستیقلالچیلار بیرلیگی یولونوزو گؤزله‌ییر!
گونئی آزربایجان دئموکراتیک تورک بیرلیگی (گادتب)
سیاسی بؤلوم
2018-02-15
