گادتب-نین مطبوعات مرکزینه داخیل اولان معلوماتا گؤره، آوسترالیا آذربایجان آسوسیاسی پرئزیدئنتی و گادتب بین الخالق علاقهلر دئپارتامئنتینین صدری سایین میکاییل اویتا ایرقچی فارس-موللا رئژیمینین کوروناویروسو زیندانلاردا یایدیغی حالدا، آذربایجانلی سیاسی محبوسلاری سربست بوراخماماقلا اونلارین حیاتینی تهلوکهیه آتدیغینی ایفشاء ائتمک مقصدیله یاشادیغی آوسترالیادا بونونلا باغلی آوسترالیا خاریجی ایشلر ناظری سایین ماریسه پاینئیه مکتوبلا مراجعت ائدیب.
سایین میکاییل اویتا ایرانین ایرقچی رئژیمینین گونئی آذربایجان میللی-مدنی و سیاسی فعاللارینی زیندانلاردان آزاد ائتمهلی اولدوغونون ضرورتینه توخوناراق بیلدیرمیشدیر کی، کوروناویروس (کووید 19) دونیادا اینسانلارین گیزلی و بؤیوک دوشمنیدیر و دونیا بو دوشمنله ساواش آپارارکن موللا رئژیمی سیاسی محبوسلاری زیندانلاردا اؤز حالینا بوراخیب و محبوسلار حیاتینی تهلوکهده گؤردوگو اوچون اعتراض ائتمهیه باشلامیشلار. لاکین فارس-موللا رئژیمی، حاقلی اولاراق اعتراض ائدن سیاسی محبوسلارا آتش آچیب و بعضی محبوسلاری اؤلدوروب و یا یارالامیشدیر. حتی اؤولادلارینین حیاتینا قارشی یارانان تهلوکهدن قورخویا دوشوب زیندانلارین قارشیسینا توپلاشان محبوس عائلهلرینه ده آتش آچیلیب.
سایین اویتا آوسترالیا حکومتیندن خواهیش ائتمیشلر کی، ایرانین آوسترالیاداکی سفیری واسطهسیله موللا رئژیمینین کوروناویروس تهلوکهسینه گؤره آذربایجانلی سیاسی محبوسلارین ائوه بوراخیلماسینی طلب ائتسین.
سایین میکاییل اویتانین مکتوبونون اینگیلیسجه متنینی تقدیم ائدیریک: