ادتاج اتحادیه دمکراتیک ترک آذربایجان جنوبی
گادتب: آراسیرا یولداشلارین بیر سیراسی سانال دونیانی دوشونجه، اویانیش هابئله ساواش دوشرگهسی اولماق یئرینه دایاز سؤزلر، سکس دوشگونلویو، یونگول ایلنجهلر، چیرکین یامانلار… کیمی آلچاقلیقلارین یئری اولدوغونا گؤره قیناییرلار. بیر یازیچی اولاراق، من ده، سانال دونیانین، تاپدالانمیش حاقلاریمیزین هابئله ایستکلریمیزین الده ائدیلمهسی اوغروندا قوللانیلماسینی چوخ ایستردیم.
آنجاق، سانال دونیامیز یاشادیغیمیز توپلومدان آیری دئییل ده، اونون تام اولاراق یانسیماسیدیر. آلچاقلیق آدلاندیردیغیمیز یوخاریداکی قونولار توپلوموموزدا چؤزوم یولو بولمایینجا، سانال دونیامیزدان سیلینمهیهجکلر. آرتیق، اونلاری چؤزمک یئرینه، اونلارین سیلینمهسینی ایستهمک ده دوز بیر باخیش دئییل!
ییرمی ایل بوندان اؤنجه، حسین الله کرم – قاتی انصار حزبالله اویهسی هابئله ایدئولوژیک اسلامچیلیغین آشیری بیر تمثیلچیسی- ایران رایو-تیلویزیونونو قینایاراق قیشقیرا-قیشقیرا دئییردی: “ایران اسلام جمهوریتینین رایو-تیلویزیونونو آچدیغیمیزدا یالنیز و یالنیز “حیدر، حیدر، حیدر…” سؤزونو ائشیتمهلیییک”! ایران رایو-تیلویزیونونو، اونون قدر آشیری اولماغین زیانلارینی بیلدییینه گؤره، اونون قدر آشیری دئییلدی! بونا باخمایاراق، اونون قدر اولماسا دا، بوتون قونولارا ایدئولوژیک باخیردی. سونوج گؤزلریمیزین اؤنوندهدیر: او رایو-تیلویزیونون بوگون نه گؤروجو-دینلهییجیسی قالمیش نه ده اعتباری!
آلبئر کامو دئییر: “سیز آتی سویون باشینا آپارا بیلرسینیز، آما اونا زورلا سو ایچدیره بیلمزسینیز”! آیدینلاریمیز توپلومسال سورونلارلا قارشیلاشدیقلاریندا “آسارام-کسرم” یوخسا “کوسرم-گئدرم” کیمی توتوملارا قاپیلماقدانسا، او سورونلاری چؤزوملهمهلیدیرلر! سانال دونیانین اویونبازلیقلارینا گؤره سانال دونیانی بوراخیب گئتمکله تهدید ائدنلر، یاشادیقلاری توپلومو دا بوراخیب گئتمهلیدیرلر! چون دئدیییم کیمی سانال دونیامیز، یاشادیغیمیز توپلومون یانسیماسیدیر!
سون سؤز: بوتون اولومسوزلوقلارینا باخمایاراق، سانال دونیا دوشونجهلریمیزی یایماق هابئله آنا دیلیمیزی قوروماق اوغروندا باشاریلی بیر وسیلهدیر. دایاز سؤزلر، سکس دوشگونلویو، یونگول ایلنجهلر، چیرکین یامانلار… کیمی قونولاردا یازیشان دیلداشلاریمیزین آنا دیلیمیزده یازیشماسی بیر اوغور ساییلا بیلر ده، منجه! آنا دیلیمیزه ایدئولوژیک باخمامالیییق! بو دیل هامیمیزین دیلیمیزدیر؛ بیر یازیچینین دا، بیر دوشونرین ده، بیر اوغرونون دا، بیر لات-لوتون ده… بیر اورهیی سینمیش یاشاییشدان بئزمیش یئره-گؤیه یامان-یوووز دئمیش گنجین ده! اونلاری سوسدورماغا گوجوموز چاتماز. گوجوموز چاتسا دا بئله، بونا حاققیمیز یوخدور!
