ادتاج اتحادیه دمکراتیک ترک آذربایجان جنوبی
گادتب: رضا خانین قارا چکمه‌لرینین آلتیندان بوغازیمیزی قورتاردیغیمیزدان یالنیز بئش ایل کئچیردی. بو بئش ایلده، کئچمیش ییرمی ایلین بوشلوغونو دولدورماغا چالیشمیشدیق. کئچمیش ییرمی ایلده، آذربایجاندا اون یئددی روزنامه (گونده‌لیک) یایینلانماقدایدی. بونلارین اون آلتیسی تام فارسجا، بیری ایسه تام ائرمنی‌جه ایمیش! دئمک، اؤز توپراق‌لاریندا اؤز آنا دیلینده بیر روزنامه‌نین یایینلانماسینی بئله، آذربایجان‌دان اسیرگه‌میشدیلر. ساده‌جه روزنامه دئییلدی، تورکجه کیتاب‌لارین دا یایینلانماسینا قاداغان قویولموشدو! داها دوغروسو، بیزیم آنا دیلمیز تام یاساقلانمیشدی.
آنجاق، رضا خانین قارا چکمه‌لرینین آلتیندان بوغازیمیزی قورتاردیغیمیز آن‌دان بری، آنا دیلیمیزی هایقیرماغا باشلامیشدیق. ایلک اولاراق، “آذربایجان” گونده‌لییینی یولا سالمیشدیق. آردیجا، تورک دیلینده تئاترلاری صحنه‌یه چیخارتمیشدیق. آردیجا آنا دیلیمیزده یازیلمیش اولان کیتاب‌لاری باسماغا (نشر ائتمه‌یه) باشلامیشدیق! آردیجا، آذر آیینین دوندوروجو هاواسیندا چیلله گئجه‌سی یئرینه بایرام هاواسینی یاشامیشدیق!
رضا خانین قارا چکمه‌لرینین آلتیندان قورتاردیغیمیز بوغازلاریمیز نفس آلماغا باشلامیشدی! “من تورکم” دئیه، هایقیرماغا باشلامیشدی! نفس آلماغا باشلادیغیمیزدا ال‌لریمیز ده جانلانمیشدی. یئنی‌دن جانلانان ال‌لریمیز، بیر داها قلم توتماغا باشلامیشدی؛ یازماغا باشلامیشدی. یازدیق، یاراتدیق، قالاق قالاق کیتاب یایدیق!
آنجاق، باشقا بیر چیلله گئجه‌سی یولدایدی! داها دوغروسو، قاباقکی ایلین آجیغینی بیزدن آلماغا جان آتماقدادیدی. رضا خانین قارا چکمه‌لرینین آلتیندان قورتاردیغیمیز بوغازلاریمیز، بو دؤنه، اوغلونون چکمه‌لرینین آلتیندا قالماقدایدی. یازیب، یاراتدیغیمیز قالاق قالاق کیتاب‌لار، قالاق قالاق یاندیریلماقدایدی! یئرلر آلوو، گؤی‌لرسه دومان ایدی!
ییرمینجی یوز ایل‌لییین بو قورخونج جینایتینه دونیا گؤز یومدو! هله ده گؤز یومماقدادیر. بوش وئرین پهلوی تؤکونتولرینی! اونلارین اؤز جینایت‌لرینی اؤرت-باسدیر ائتمه‌یه چالیشمالاری دوغال‌دیر. آنجاق، پهلوی‌نین یئرینده اوتوران، پهلوی‌نی چیرپماق اوچون هئچ فورصتی الدن وئرمه‌ین بوگونکو رژیم بئله، بو بؤیوکلوکده جینایتی دانماقدادیر! دئمک، آذربایجان، بوتون دوشمن‌لری بیر آرایا گتیرن، اورتاق بیر دوشمن هابئله بنزرسیز بیر وارلیق‌دیر!
بئله‌دیر منیم ائلیم! کیتاب‌لاریمیزی یاندیردیلار، قلم‌لریمیزی سیندیردیلار، دوداق‌لاریمیزی تیکدیلر، بوغازلاریمیزی آسدیلار. آنجاق، دیلیمیزی کسه بیلمه‌دیلر. داها دوغروسو دیلیمیزی کسمه‌یه گوج‌لری چاتمادی! بئله‌لیک‌له، آنا دیلیمیز بیر داها عنقا قوشو کیمی قالاق قالاق یاندیریلمیش اولان کیتاب‌لاریمیزین کولوندن آیاغا قالخدی! بیر داها جانلاندی! بیر داها کیتاب‌لاریمیز یازیلدی! ایندینین ایندیسی ده، کیتاب‌لاریمیز، دوشمن‌لریمیزین اوره‌یینه قورخو سالیر. بونا گؤره ده، #علیرضا_فرشی کیمی “تورکجه کیتاب پایلایان” یولداش‌لاریمیز دوستاق‌دیرلار. بونا گؤره ده، شاعیرلریمیزله یازیچی‌لاریمیز آغیر باسقی‌لار آلتیندادیرلار. آنجاق، بیز بیر عنقا قوشو کیمی هر زامان اؤز کولوموزدن قالخاراق یئنی‌دن جانلانماغی باشارمیشیق! باشاراجاغیق دا…
