دوشنبه , می 27 2024
azfa

محمد رحمانی فر: قوتلاماغی چتین اولان بایرام

گادتب: بیر سیرالاری، بایراما نئچه گون قالاندان بری، بایرام تبریک‌لری گؤندرمکده‌دیرلر. بیر سیرالاری ایسه، میللتمیزین بو زور گون‌لرینی، دوستاق‌داکی یولداش‌لاریمیزین اؤزلمینی…آنیمسایاراق،  بئله بیر بایرامی قوتلاماقدا چتین‌لیک چکیرلر. هله بو آرادا “بایرام کئفی‌سازلارین بایرامی‌دیر، کاسیبا نه بایرام؟!” دئین‌لر ده واردیر!

بایرامین ایلک ساعات‌لاریندا فیکرینیزی بو دارتیشمالاری آچیقلاماقلا یورماق ایسته‌میرم. آنجاق، بایرام ائلیمیزین بایرامی‌دیر. وارلی‌نین دا، یوخسولون دا، ائولرینده عاییله‌لرینین یانیندا اولان‌لارین دا، دوستاق‌دا یاخود سورگون‌ده عاییله‌لرین‌دن اوزاق دوشن‌لرین ده!

قبول ائدیرم کی اصیل بایرام، دئمک هامیمیزین جاندان اورکدن آرزولادیغیمیز  بایرام، بوتون آجی‌لاریمیزین آرادان قالخدیغی گون‌دور. یوخسوللوغون سونا چاتدیغی گون‌دور. دوستاق‌لارین ائولرینه دؤندویویو گون‌دور. سورگون‌‌‌لرین وطنه قاییتدیغی گون‌دور. قیساجاسی؛ اصیل بایرام، میللتمیزین اؤزگورلویه قاووشدوغو گون‌دور!

بونا باخمایاراق، دئدیییم کیمی، بایرام ننه-بابالاریمیزدان بیزه یادگار قالان میللی بیر دَب‌دیر. بو دَبی قوتلاماق ایسه میللی بیر تؤره‌دیر. اونوتمایاق کی میللی حرکتیمیزین لاپ باشدا گئدن آماج‌لارینین بیری ده دب‌لریمیزی هابئله تؤره‌لریمیزی قوروماق‌دیر. بونا گؤره، من ده بو بایرامی، بوتون میللتمیزه، ایستر وارلیسینا، ایستر یوخسولونا، ایستر اؤز ائولرینده عاییله‌لرینین یانیندا اولانلارا، ایستر عاییله‌لریندن اوزاق دوشموش اولان دوستاق هابئله سورگون فیکیرداش‌لاریمیزا تبریک دئییرم.

آنجاق، سؤزومون سونوندا، اؤزل اولاراق، بایرامی، تئلفون آرخاسیندان دوستاقداکی یاخود سورگونده‌کی بالالارینین بایرام تبریکینی ائشیدرکن آغلاماقدان اؤزلرینی ساخلایا بیلمه‌یین آغ‌ بیرچک آنالاریمیزلا آغ ساققال آتالاریمیزا تبریک دئمه‌یی اؤزومه بورج بیلیرم.

اومورام، بو بایرام، قوتلاماغی چتین اولان بایرام‌لاریمیزین سونو اولسون!

دوباره امتحان کنید

از سرگیری صادرات از راه‌آهن «باکو-تفلیس-قارص»

گادتب: به گزارش مرکز گادتب، فعالیت راه‌آهن «باکو-تفلیس-قارص» که سال گذشته متوقف شده بود، از …

حمایت از فعالین محبوس حرکت ملی آذربایجان؛ آزادلیق اوغروندا محبوس اولانلارا آزادلیق

گادتب: به گزارش مرکز گادتب، جمعی از جوانان حرکت ملی آذربایجان دیروز ۴ خردادماه ۱۴۰۳ …