پنج‌شنبه , ژانویه 28 2021
azfa

پروفسور زهتابی‌نین لاپ بؤیوک شاه‌اثری

گادتب: پروفسور زهتابی، گونئی آذربایجان تورک‌لرینین اویانیش سوره‌جینده، اؤزونه دانیلماز یئر آچابیلمیشدیر. “ایران تورکلرینین اسکی تاریخی” آدلی اثری ایله فارسچی‌لارین ایل‌لر بویو اویدوردوغو یالان‌لارا جواب وئرمیش، او یالان‌لارا اویموش اولان تورک‌لری اؤز گئرچک تاریخ‌لری ایله تانیشدیرمیش، بئله‌لیک‌له ده اونلارا تاریخی باخیمدان، اؤزگوونج (اعتماد به نفس) قازاندیرمیش‌دیر.

پروفسور زهتابی، دیل‌لر ازبری اولان شعرلری ایله آنا دیلیمیزی دیری ساخلاییب، روح‌لاریمیزی جانلاندیریب، تورکجه‌میزین گؤزل‌لیک‌لرینی گؤزلریمیزین اؤنونه سرگیله‌میشدیر. اونون “سو دئییب‌دیر منه اولده آنام آب کی یوخ / یوخو اؤیرتدی اوشاقلیقدا منه، خواب کی یوخ” شعری، بیچیم باخیمیندان اؤز بنزرسیز گؤزل‌لییی هابئله آخیجی‌لیغی ایله، ایچریک باخیمیندان ایسه هابئله اویاندیریجی ماهیتی ایله گونئی آذربایجان تورک‌لرینین آسیمیلاسیونا قارشی اعتیراض سسی اولموشدور.

پروفسور زهتابی، “شاهین زنجیرده” آدلی شعر توپلوسوندا بیزی زوراکیلیق‌لاری قارشی آیاقلاندیریر. او ساده‌جه بیزیم باشیمیزا گلن‌لری بیزه آچیقلاماییر، بیزه یول دا گؤستریر: “افسانه‌دیر، شمشیره دایانمازسا آزادلیق”!

تورکجه‌میزین دیل بیلگیسی قونوسوندا یازدیغی کیتاب‌لارلا بیزه آنا دیلیمیزین قایدا قورال‌لارینی اؤیره‌دیر. او بیزه آنا دیلیمیزی یالنیز قایدا قورال‌لارینی ازبرله‌مک‌له اؤیرتمه‌ییر. اونون یازدیغی تورکجه اثرلری آنا دیلیمیزی نئجه یازماقدا بیزه یاردیمچی اولور.

پروفسور زهتابی‌نین یازدیغی کیتاب‌لار هابئله یاراتدیغی اثرلر بیرَربیرَر اؤنملی هابئله گؤرکملی‌دیرلر. آنجاق، منجه اونون شاه‌اثرینی یازیب یاراتدیغی اثرلرینده دئییل، اونون یاشاییشیندا آختارمالیییق! دئمک، زهتابی‌نین شاه‌اثری اونون یاشادیغی یاشاییشی‌دیر. گنج‌کن آذربایجان دموکرات فیرقه‌سینه قوشولدوغونا گؤره، آذربایجان میللی حؤکومتی‌نین ییخیلماسیندان سونرا بیر چوخ وطنداش‌لاریمیزا تای جانینی گؤتوروب اؤلکه‌سیندن قاچماق زوروندا قالیر. سیبری‌نین شاختا هاواسیندا استالین-ین  بوزلو داموسونا قاتلانماق زوروندا قالیر…

 بوتون بونلارا باخمایاراق، نه استالین، نه محمدرضا شاه، نه ده سیبری‌نین جان‌یاندیریجی شاختاسی اونو کسه بیلیر. اونون اوره‌ییینی هر زامان قیزیشدیران بیر سئوگی وار ایدی، ایچینده! وطن سئوگیسی، میللت سئوگیسی! بو سئوگی، هر زامان، اونا دایاق اولور. اوخوموش هابئله بیلگین بیر اینسان اولور. مسکو، برلین، بغداد کیمی آدلیم دانشگاه‌لاردا درس وئریر. بیلیمسل چالیشمالارینا گؤره، پروفسورلوق روتبه‌سینی قازانیر. آنجاق، اؤزونو، میللتینی هابئله گئریده بوراخدیغی وطنینی هئچ زامان اونوتماییر.

محمدرضا شاهین رژیمی دئوریلدیکدن سونرا اؤلکه‌سینه قاییدیر. بیر باش تبریز دانیشگاهیندا آنا دیلیمیزی درس وئریر. یئنی رژیمده، فارسچیلیغین بیر داها جانلانماسیندان دولایی ایشدن قیراغا قویولور. دؤنه‌لرله توتوقلانیب دوستاق اولور. آنجاق، هئچ بیر گوج اونو دایاندیرا بیلمه‌یه یئتمه‌ییر. بو دؤنه یازیب یاراتدیغی اثرلرله بیزه یول گؤستریر. عؤمرونون سون گونونه دک، یازماقدان، دانیشماقدان، دوشونمکدن هابئله باشقالارینا یول گؤسترمک‌دن اوسانماییر. بئله‌لیک‌له ده، شاه‌اثر آدلاندیرا بیله‌جه‌ییمیز بیر یاشاییش یاشاییر!

سؤزلوک:

اویانیش سوره‌جی: روند بیداری

اؤزگووونج: اعتماد به نفس

سرگیله‌میشدیر: به نمایش گذاشته است

بیچیم: فورم

ایچریک: محتوا، مضمون

قورال: قانون، قاعده

اؤنملی: مهم

گؤرکملی: جذاب، گیرا

دامو: جهنم

دوستاق: زندان، زندانی

دوباره امتحان کنید

ارتش اسرائیل برنامه عملیاتی علیه برنامه هسته‌ای ایران آماده می‌کند

گادتب: به گزارش مرکز خبر گادتب، آویو کوخاوی، رئیس ستاد ارتش اسرائیل در نشست مجازی …

ظریف در دیدار از ارمنستان گفت ارمنستان دوست و همسایه قدیمی ایران است

گادتب: به گزارش مرکز خبر گادتب، ایران حامی ارمنستان غاصب، جنگ قاراباغ را فرصتی برای …

دیدگاهتان را بنویسید