ادتاج اتحادیه دمکراتیک ترک آذربایجان جنوبی
گادتب: بو گون ۱۵ سئنتیابر باکینین تورک اوردوسونون یاردیمی ایله ائرمنی-بولشئویک ایشغالین‌دان آزاد ائدیلدیگی گون‌دور. ۱۰۵ ایل اؤنجه ده ائرمنیلر روسلارین یاردیمی ایله آذربایجان اراضیلرینی، او جمله‌دن باکینی ایشغال ائدیب آذربایجان تورکلرینه قارشی سویقیریم تؤرتمیشلر. ۱۹۱۸-جی ایلین آپرئل-مارت آیلارین‌دا باکینی آذربایجان‌دان قوپارماق ایسته‌ین روس-ائرمنی بیرلشمه‌لری شهری الینه کئچیردی. عثمانلینین اؤزونون ده روسییا و بیر سیرا غرب دؤولتلرینی هوجومونا معروض قالماسینا باخمایاراق، ایشغال ائدیلمیش باکی صرف تورک اوردوسونون یاردیمی ایله ۱۵ سئنتیابردا آزاد ائدیلدی.
تکجه باکینین دئییل قوزئی آذربایجانین مختلیف اراضیلری و شرقی آنادولو ایله یاناشی گونئی آذربایجانین غرب بؤلگه‌سی ده روسییا و باشقا غرب دؤولتلرینین حمایه‌سی ایله تشکیلاتلان‌دیریلان ائرمنی، آیسور و کوردلرین الی ایله دهشت‌لی سویقیریما معروض قالدی. تکجه اورمییا، سالماس و خوی بؤلگه‌سین‌ده رسمی ایستاتیستیکایا گؤره ۲۰۰ مین آذربایجان تورکو سویقیریما معروض قالدی.
هر طرف‌دن روسییا و غرب دؤولتلرینین هوجومونا معروض قالان عثمانلی تورکیه‌سی بو آغیر شرایط‌ده ائرمنیلر طرفین‌دن سویقیریم معروض قالان شرقی آنادولو، قوزئی آذربایجان و گونئی آذربایجان‌دا تورکلرین تامامیله محو ائدیلمه‌سینین قارشی‌سینی آلماق اوچون حرکته کئچدی. ۱۹۱۸-جی ایلده شرقی آنادولونون ایشغال‌دان آزاد ائدیلمه‌سین‌دن سونرا قافقاز ایسلام اوردوسو نورو پاشانین باشچی‌لیغی ایله قوزئی آذربایجانا داخیل اولوب، آذربایجان خالق جمهوریتینه یاردیما گلدی، سئنتیابر آیینین ۱۵-ده وار اولان پایتاختیمیز باکی ائرمنی-بولشئویک ایشغالین‌دان آزاد ائدیلدی و آذربایجان خالق جمهوریتینین پایتاختی باکییا کؤچورولدو.
قافقاز ایسلام اوردوسو ایله یاناشی عثمانلی اوردوسونون دیگر بیر حیسه‌سی ده گونئی آذربایجانا داخیل اولوب، خوی شهرینین ایشغال ائدیلمه‌سینین قارشی‌سینی آلماقلا یاناشی سئنتیابرین اورتالارین‌دا سالماسی و سئنتیابرین سونلارین‌دا ایسه اورمییانی ائرمنی-آیسور ایشغالین‌دان قورتاردی.
همین دؤورده تورک اوردوسو نئجه یاردیما گلمیش‌دیسه، گونوموزده ده تورک اوردوسونون یاردیمینی حیس ائتمک مومکون‌دور. قاراباغین ائرمنی ایشغالین‌دان آزاد ائدیلمه‌سینده ده تورکیه‌نین معنوی و سیاسی حمایه‌سی اؤز سؤزونو دئدی. بو گون آرتیق قاراباغ و شرقی زنگه زور دا آزاد ائدیلمیش‌دیر.
گونئی آذربایجان دئموکراتیک تورک بیرلیگی (گادتب) ۱۵ سئنتیابر ظفری موناسیبتیله قافقاز ایسلام اوردوسو و نورو پاشانین خاطره‌سینی بؤیوک سایغی ایله آنیر، آذربایجان-تورک میللتینی تبریک ائدیر و تورک اوردوسونون آذربایجانا گلیشی و دسته یینی یوکسک ده یرلندیریر.
اژدر تاغی‌زاده
گونئی آذربایجان دئموکراتیک تورک بیرلیگی (گادتب) باشقانی
